കൊച്ചി: എറണാകുളം മഹാരാജാസ് കോളേജില് എസ്എഫ്ഐ-കെഎസ്യു സംഘര്ഷം. എട്ട് കെഎസ്യു പ്രവര്ത്തകര്ക്ക് പരിക്കേറ്റതായാണ് വിവരം. ഇവരെ ജനറല് ആശുപത്രിയില് പ്രവേശിപ്പിച്ചു. ഒരു വിദ്യാര്ഥിയുടെ തലക്ക് സാരമായ പരിക്കേറ്റിട്ടുണ്ട്.
ഇടുക്കി എന്ജിനീയറിങ് കോളേജില് എസ്എഫ്ഐ പ്രവര്ത്തകന് കുത്തേറ്റ് മരിച്ച സംഭവത്തില് പ്രതിഷേധിച്ച് എസ്എഫ്ഐ പ്രവര്ത്തകര് ക്യാമ്പസിൽ പ്രകടനം നടത്തുന്നതിനിടെയാണ് സംഘര്ഷം ഉണ്ടായത്. പ്രകടനത്തിനിടെ എസ്എഫ്ഐ പ്രവര്ത്തകരും കെഎസ്യു പ്രവര്ത്തകരും തമ്മില് വാക്കേറ്റമുണ്ടാവുകയും ഇത് സംഘര്ഷത്തില് കലാശിക്കുകയും ആയിരുന്നു.
വിവരമറിഞ്ഞ് പോലീസ് സംഘം ക്യാമ്പസിൽ എത്തിയിട്ടുണ്ട്. നിലവില് സ്ഥിതിഗതികള് ശാന്തമാണ്. സംഘര്ഷസാധ്യത കണക്കിലെടുത്ത് മഹാരാജാസ് കോളേജിലും സമീപത്തെ ലോ കോളേജിലും പോലീസ് സുരക്ഷ ഏര്പ്പെടുത്തിയിട്ടുണ്ട്.
അതേസമയം ഇടുക്കി പൈനാവ് ഗവ. എൻജിനീയറിങ് കോളേജിൽ എസ്എഫ്ഐ പ്രവര്ത്തകനെ കൊലപ്പെടുത്തിയ സംഭവത്തില് സാങ്കേതിക സര്വലാശാല റിപ്പോർട് തേടി. റിപ്പോര്ട്ടിന് ശേഷം തുടര്നടപടി എടുക്കുമെന്ന് പിവിസി ഡോ. അയൂബ് പ്രതികരിച്ചു.
Most Read: 80ഉം 20ഉം തമ്മിലുള്ള യുദ്ധം; ഹിന്ദു-മുസ്ലിം അനുപാതത്തെ സൂചിപ്പിച്ച് യോഗി