വയനാട്: ഖരമാലിന്യ സംസ്‌കരണത്തിന് മീനങ്ങാടി പഞ്ചായത്തിന് നവകേരളം പുരസ്‌കാരം. സംസ്‌കരണത്തിന് ഫലപ്രദമായ സൗകര്യങ്ങൾ ഒരുക്കിയതിനാണ് പഞ്ചായത്ത് പുരസ്‌കാരത്തിന് അർഹമായത്. ഹരിത മിഷനും ശുചിത്വ മിഷനും ചേർന്ന് നടത്തിയ പരിശോധനയിൽ 70 ശതമാനത്തിന് മുകളിൽ മാർക്ക് നേടുന്ന പഞ്ചായത്തുകളെയാണ് അവാർഡിന് പരിഗണിക്കുന്നത്.
മീനങ്ങാടി പഞ്ചായത്തിന്റെ നേതൃത്വത്തിൽ മാലിന്യ സംസ്‌കരണവുമായി ബന്ധപ്പെട്ട് നിരവധി പ്രവർത്തനങ്ങൾ നടത്തുന്നതായി പരിശോധനാ സംഘം വിലയിരുത്തി. ദിവസേന 1,056 കിലോഗ്രാം അജൈവ മാലിന്യവും 18.09 ടൺ ജൈവ മാലിന്യവുമാണ് ഇവിടെ ഉൽപാദിപ്പിക്കപ്പെടുന്നത്. ഇത് തരംതിരിച്ച് വിപണനം നടത്തുകയാണ് രീതി. പ്ളാസ്‌റ്റിക് ഷ്രെഡിങ് യൂണിറ്റിൽ പൊടിക്കുന്ന മാലിന്യം പഞ്ചായത്തിന്റെ ടാറിങ് ആവശ്യങ്ങൾക്ക് ഉപയോഗിക്കുകയും മറ്റ് തദ്ദേശ സ്‌ഥാപനങ്ങൾക്ക് കൈമാറുകയും ചെയ്യുന്നുണ്ട്.
ഇതുവരെ ഈ ഇനത്തിൽ 5,01,106 രൂപ പഞ്ചായത്തിന് ലഭിച്ചിട്ടുണ്ട്. ജനപ്രതിനിധികളുടെയും സന്നദ്ധ പ്രവർത്തകരുടെയും സഹകരണത്തോടെ ഹരിത കർമ സേന വീടുകളിൽ കുമിഞ്ഞു കൂടിയിരുന്ന മാലിന്യങ്ങൾ തരംതിരിച്ചു ശേഖരിക്കുകയും ക്ളീൻ കേരള മിഷന് കൈമാറുകയും ചെയ്‌തതടക്കം നിരവധി പദ്ധതികളാണ് പഞ്ചായത്ത് നടപ്പിലാക്കിയത്. ഇതിന്റെ ഒക്കെ ഫലമായാണ് പഞ്ചായത്തിനെ തേടി അവാർഡ് എത്തിയത്.
Read Also: കോഴിക്കോട് മെഡിക്കൽ കോളേജിൽ നിപ ഐസൊലേഷൻ വാർഡ് ഒരുങ്ങുന്നു
