കോഴിക്കോട്: മെഡിക്കൽ കോളേജ് ആശുപത്രിയിൽ നിപ വാർഡ് ഒരുങ്ങുന്നു. ഇതിന്റെ പ്രാരംഭ നടപടികൾ ആരംഭിച്ചതായി അധികൃതർ അറിയിച്ചു. മെഡിക്കൽ കോളേജിലെ മാതൃശിശു സംരക്ഷണ കേന്ദ്രത്തിലാണ് നിപ ഐസൊലേഷൻ വാർഡ് ഒരുങ്ങുന്നത്. നിലവിൽ ഇവിടെ കോവിഡ് രോഗികളാണുള്ളത്. ഇവരെ പിഎംഎസ്എസ്വൈ ബ്ളോക്കിലെ പുതിയ വാർഡുകളിലേക്ക് മറ്റും.
പിഎംഎസ്എസ്വൈ ബ്ളോക്കിലെ അഞ്ചാം നിലയിലാണ് കോവിഡ് രോഗികൾക്കായി വാർഡ് ഒരുക്കുന്നത്. നിലവിൽ ഗർഭിണികൾക്കും കുട്ടികൾക്കും പ്രത്യേക നിരീക്ഷണ വാർഡ്, പ്രസവമുറി, ശസ്ത്രക്രിയ തിയേറ്റർ, ഐസിയു തുടങ്ങിയവ സജ്ജീകരിക്കുന്ന പ്രവൃത്തികൾ നടക്കുകയാണ്.
അതേസമയം, കോവിഡ് രോഗികളെ മാറ്റിയശേഷം വാർഡുകൾ അണുവിമുക്തമാക്കും. തുടർന്നായിരിക്കും നിപയുമായി ബന്ധപ്പെട്ട് നിരീക്ഷണത്തിൽ ആക്കുന്ന സ്ത്രീകളെയും കുട്ടികളെയും ഐസൊലേഷൻ വാർഡിലേക്ക് മാറ്റുക. ഒരാഴ്ചക്കുള്ളിൽ വാർഡുകൾ അണുവിമുക്തമാക്കുന്ന പ്രവൃത്തികൾ നടത്തുമെന്ന് ആശുപത്രി അധികൃതർ അറിയിച്ചു.
Read Also: നിപ; വവ്വാലുകളെ പിടികൂടി സാംപിൾ ശേഖരണം ഇന്ന് തുടങ്ങും