പടിഞ്ഞാറത്തറ: പേപ്പട്ടിയുടെ കടിയേറ്റ് രണ്ട് കുട്ടികൾ ഉൾപ്പടെ 15 പേർക്ക് പരിക്ക്. പടിഞ്ഞാറത്തറ പഞ്ചായത്തിലെ പാണ്ടങ്ങോടും പരിസര പ്രദേശങ്ങളിലുമാണ് രണ്ട് പേപ്പട്ടികളുടെ ആക്രമണമുണ്ടായത്. വെള്ളിയാഴ്‌ച രാവിലെയാണ് സംഭവം.
ചുണ്ടിനും മുഖത്തും സാരമായി കടിയേറ്റ കാഞ്ഞിരോളി മുസ്‌തഫയുടെ മകൻ മുനവർ (5), വിൻസെന്റിന്റെ ഒരു വയസുള്ള മകൻ എന്നിവരെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. പരിക്കേറ്റ ബാക്കി 13പേരെ കൽപറ്റ ജനറൽ ആശുപത്രിയിലാണ് പ്രവേശിപ്പിച്ചിരിക്കുന്നത്. വീടിനകത്തടക്കം കയറിയാണ് പേപ്പട്ടി ആളുകളെ ആക്രമിച്ചത്. മൂന്ന് പശുക്കളെയടക്കം കടിച്ച് പരിക്കേൽപ്പിച്ചു. നിരവധി വളർത്തുമൃഗങ്ങൾക്കും കടിയേറ്റിട്ടുണ്ട്. ഒരു പട്ടിയെ നാട്ടുകാർ പിടികൂടി സംഭവ സ്‌ഥലത്തുവെച്ച് തന്നെ തല്ലിക്കൊന്നു.
രണ്ടാമത്തെ പട്ടിയെയും പിടികൂടിയിട്ടുണ്ട്. പ്രദേശവാസികൾ ജാഗ്രത പാലിക്കണമെന്ന് മുന്നറിയിപ്പ് നൽകി. പരിക്കേറ്റവരെ ആദ്യം ചെന്നലോട് പിഎച്ച്സിയിലായിരുന്നു പ്രവേശിപ്പിച്ചത്. പിന്നീട് കൽപറ്റ ആശുപത്രിയിലേക്ക് മാറ്റുകയായിരുന്നു. പ്രദേശത്ത് മുൻപും പേപ്പട്ടിയുടെ ആക്രമണം ഉണ്ടായിട്ടുണ്ട്.
Read also: പ്രാർഥനകൾ വിഫലം; കുഴൽ കിണറിൽ വീണ മൂന്ന് വയസുകാരന് ദാരുണാന്ത്യം
