അബുദാബി: വ്യാജ വാർത്തകളും അസത്യങ്ങളും പ്രചരിപ്പിക്കുന്നവർക്ക് എതിരെ കടുത്ത ശിക്ഷ ഉണ്ടാകുമെന്ന് മുന്നറിയിപ്പ് നൽകി യുഎഇ ഫെഡറൽ പബ്ലിക് പ്രോസിക്യൂഷൻ. പൊതുജനങ്ങൾക്ക് ഇടയിൽ നിയമാവബോധം സൃഷ്ടിക്കാൻ ലക്ഷ്യമിട്ട് പ്രോസിക്യൂഷൻ നടത്തുന്ന ക്യാമ്പയിനിന്റെ ഭാഗമായി അധികൃതർ സാമൂഹിക മാദ്ധ്യമങ്ങളിലൂടെ ആണ് ഇക്കാര്യം അറിയിച്ചത്.
അസത്യമെന്ന് അറിഞ്ഞുകൊണ്ട് വിവരങ്ങൾ പ്രചരിപ്പിക്കുക, നീതിന്യായ സംവിധാനത്തെ തെറ്റിദ്ധരിപ്പിക്കുക, കുറ്റകൃത്യങ്ങളുടെ തെളിവുകൾ മറച്ചുവക്കുക തുടങ്ങിയവയെല്ലാം ഫെഡറൽ ശിക്ഷാ നിയമം 266-ാം വകുപ്പ് പ്രകാരം കുറ്റകരമാണെന്ന് അധികൃതർ വ്യക്തമാക്കി. ഇത്തരം പ്രവർത്തികളിൽ ഏർപ്പെടുന്നവർക്ക് ജയിൽ ശിക്ഷ ലഭിക്കുമെന്നും മുന്നറിയിപ്പ് നൽകിയിട്ടുണ്ട്.