കാബൂൾ: അഫ്‌ഗാനിസ്‌ഥാനിൽ ഭരണം പിടിച്ചെടുത്തതിന് പിന്നാലെ രാജ്യത്തിന്റെ പേരുമാറ്റി താലിബാന്‍. ഇസ്‌ലാമിക് റിപ്പബ്ളിക് ഓഫ് അഫ്‍ഗാനിസ്‌ഥാന്‍ എന്നതിന് പകരം ഇസ്‌ലാമിക് എമിറേറ്റ്സ് ഓഫ് അഫ്‍ഗാനിസ്‌ഥാന്‍ എന്നായിരിക്കും പുതിയ പേര്. ഇക്കാര്യം താലിബാന്‍ വക്‌താവ് സ്‌ഥിരീകരിച്ചു.
അതേസമയം, കാബൂൾ വിമാനത്താവളം അടച്ചതിനെ തുടർന്ന് എയർ ഇന്ത്യ ഇന്ന് നടത്താനിരുന്ന സർവീസുകൾ റദ്ദാക്കി. കാബൂളിൽ കുടുങ്ങിയ ഇന്ത്യക്കാരെ കൊണ്ടുവരാനായി നേരത്തെ അഫ്‌ഗാനിസ്‌ഥാനിലേക്ക് അടിയന്തരമായി എയർ ഇന്ത്യ വിമാനം പുറപ്പെടാൻ തീരുമാനമായിരുന്നു. എയര്‍ ഇന്ത്യ വിമാനം ഉച്ചയ്‌ക്ക്‌ 12.30ന് കാബൂളിലേക്ക് പുറപ്പെടാനാണ് പുനക്രമീകരിച്ചിരുന്നത്. രണ്ട് വിമാനങ്ങള്‍ കൂടി തയ്യാറാക്കി നിര്‍ത്താന്‍ എയര്‍ ഇന്ത്യയ്‌ക്ക്‌ കേന്ദ്രസര്‍ക്കാര്‍ നിർദ്ദേശവും നല്‍കിയിരുന്നു.
കാബൂൾ- ഡെൽഹി അടിയന്തര യാത്രയ്‌ക്ക്‌ തയ്യാറെടുത്തിരിക്കാൻ ജീവനക്കാർക്കും കേന്ദ്രസർക്കാർ നിർദ്ദേശം നൽകിയിരുന്നു. എന്നാൽ കാബൂൾ വിമാനത്താവളം അടച്ചതോടെ അവിടെ കുടുങ്ങിയ ഇന്ത്യക്കാർക്ക് തിരികെയെത്താനുള്ള മാർഗവും നിലവിൽ ഇല്ലാതായിരിക്കുകയാണ്.
Read also: പ്രസിഡണ്ടിന്റെ കൊട്ടാരത്തിൽ നിന്ന് അഫ്‌ഗാൻ പതാക നീക്കി താലിബാൻ
