തിരുവനന്തപുരം : സംസ്‌ഥാനത്ത് എസ്എസ്എൽസി, ഹയർസെക്കൻഡറി, വൊക്കേഷണൽ ഹയർസെക്കൻഡറി പരീക്ഷകളുടെ മൂല്യനിർണയം ആരംഭിക്കുന്ന സാഹചര്യത്തിൽ, മൂല്യനിർണയത്തിന് നിയോഗിച്ചിട്ടുള്ള അധ്യാപകരെ കോവിഡ് ഡ്യൂട്ടിയിൽ നിന്നും ഒഴിവാക്കി. ജൂൺ ആദ്യവാരമാണ് മൂല്യനിർണയം ആരംഭിക്കുന്നത്.
എസ്എസ്എൽസി മൂല്യനിർണയ ക്യാംപുകൾ സംസ്‌ഥാനത്ത് ജൂൺ 7ആം തീയതി ആരംഭിക്കും. തുടർന്ന് 16 പ്രവൃത്തി ദിവസങ്ങൾക്ക് ശേഷം ജൂൺ 25ആം തീയതി മൂല്യനിർണയം പൂർത്തിയാക്കും. 70 ക്യാംപുകളാണ് സംസ്‌ഥാനത്ത് എസ്എസ്എൽസി മൂല്യനിർണയത്തിനായി തയ്യാറാക്കുന്നത്. ഇവിടങ്ങളിൽ 12,512 അധ്യാപകർ മൂല്യനിർണയം പൂർത്തിയാക്കും.
അതേസമയം സംസ്‌ഥാനത്ത് ഹയർസെക്കൻഡറി, വൊക്കേഷണൽ ഹയർസെക്കൻഡറി പരീക്ഷകളുടെ മൂല്യനിർണയം ജൂൺ 1ആം തീയതി ആരംഭിക്കും. ഹയര്‍സെക്കൻഡറി വിഭാഗത്തില്‍ 79 ക്യാംപുകളിലായി 26,447 അധ്യാപകരേയും, വൊക്കേഷണല്‍ ഹയര്‍സെക്കൻഡറി വിഭാഗത്തില്‍ 8 ക്യാംപുകളിലായി 3,031 അധ്യാപകരേയുമാണ് മൂല്യനിര്‍ണയത്തിനായി നിയോഗിച്ചിട്ടുള്ളത്. തുടർന്ന് ജൂൺ 19ആം തീയതി ക്യാംപ് അവസാനിക്കും.
Read also : അപേക്ഷിച്ച് മണിക്കൂറുകൾക്കകം ആനന്ദിന്റെ വീട്ടിൽ വെളിച്ചമെത്തി; കെഎസ്‌ഇബിക്ക് നന്ദി
