കോവിഡ് മഹാമാരിയുടെ കാലം മനുഷ്യരുടെ ഉപബോധ മനസുകളിൽ ഉണ്ടാക്കിയിരിക്കുന്ന ആശങ്കകള്, ഭയങ്ങൾ നമ്മുടെ ഭാവനകളെയും പ്രവർത്തികളെയും സ്വാധീനിച്ചിരിക്കുന്ന ഈ കാലത്ത് സമാനമായ ഒരു അവസ്ഥയുടെ ഭീതി നിറഞ്ഞ നിമിഷങ്ങളെ വെള്ളിത്തിരയിലേക്ക് ആവാഹിക്കുന്ന സിനിമയാണ് ‘രാ’.
സോംബി മൂവി ഗണത്തിൽ പെടുന്ന ‘രാ’ തയ്യാറാക്കുന്നത് കിരണ് മോഹന് എന്ന യുവ സംവിധായകനാണ്. തമിഴില് ‘ബ്രഹ്മപുരി’ എന്ന ഹൊറര് ചിത്രവും, റിലീസിന് തയ്യാറെടുക്കുന്ന ‘സണ്ടളര്കര്’ എന്ന തമിഴ് ത്രില്ലര് ചിത്രവും ഒരുക്കിയ കൊച്ചിക്കാരനായ കിരണ് മോഹന്റെ മലയാളത്തിലെ ആദ്യചിത്രമാണ് ‘രാ’.
പൃഥ്വിരാജ് നായകനായ ഹൊറര് ചിത്രം ‘എസ്ര’ യുടെ സഹ രചയിതാവായിരുന്ന മനു ഗോപാലാണ് ‘രാ’യുടെ രചന നിര്വഹിച്ചിരിക്കുന്നത്, മലയാളത്തിലെ ആദ്യത്തെ സോംബി മൂവിയായാണ് ‘രാ’ രൂപം കൊള്ളുന്നതെന്ന് അണിയറ പ്രവര്ത്തകര് പറഞ്ഞു. ഒലാല മീഡിയയുടെ ബാനറില് അബീല് അബൂബേക്കർ നിർമിക്കുന്ന ‘രാ’യുടെ പ്രചരണാർഥം മെയ് 7ന് പുറത്തിറക്കിയ ആദ്യ ‘സ്നീക് പീക്ക്’ വീഡിയോ ഇവിടെ കാണാം.
‘നൈറ്റ്ഫാൾ പാരനോയ’ അഥവാ രാത്രി കാലങ്ങളിലെ ഭ്രാന്തൻ എന്ന ടാഗ്ലൈനോടെ പുറത്തിറങ്ങുന്ന ‘രാ’ പ്രേക്ഷക പ്രതീക്ഷകള്ക്കൊപ്പം നില്ക്കുമെന്ന് ചിത്രത്തിന്റെ അണിയറ പ്രവർത്തകർ വ്യക്തമാക്കി. പാട്ടും ഡാന്സും കോമഡിയും ഒന്നുമില്ലാതെ, ഭയം നിറഞ്ഞ നിശാജീവിതത്തിന്റെ നേർക്കാഴ്ച്ചയാണ് ഈ സിനിമ; സംവിധായകൻ കൂട്ടിച്ചേർത്തു.
കരീബിയൻ നാടോടിക്കഥകളിൽ നിന്ന് രൂപംകൊണ്ട സാഹിത്യ-ചലച്ചിത്ര മേഖലയാണ് സോംബി. മന്ത്ര-തന്ത്രങ്ങളാൽ ജീവൻ വയ്ക്കപ്പെട്ട മൃതശരീരത്തെയാണ് സോംബി എന്ന് വിശേഷിപ്പിക്കുന്നത്. സോംബി ഇതിവൃത്തമാക്കി വിവിധ ഭാഷകളിൽ നിരവധി പുസ്തകങ്ങളും ചലച്ചിത്രങ്ങളും പുറത്തുവന്നിട്ടുണ്ട്. അമേരിക്കയിൽ 1929ൽ പ്രസിദ്ധീകരിച്ച വില്യം സീബ്രൂക്കിന്റെ മാജിക് ഐലൻഡ് എന്ന കൃതിയാണ് സോംബി സാഹിത്യത്തിന് തുടക്കം കുറിച്ചത്. 1932ൽ ആദ്യ ഇംഗ്ളീഷ് ചലച്ചിത്രവും സോംബി ഇതിവൃത്തമാക്കി പുറത്തിറങ്ങി.
പിന്നീട്, സോംബി പ്രമേയം ആസ്പദമാക്കി ജോർജ് എ റൊമറോവിന്റെ ‘നൈറ്റ് ഒവ് ദ ലിവിങ് ഡെഡ്’ എന്ന ഇംഗ്ളീഷ് ചലച്ചിത്ര പരമ്പരകൾ ലോകമാകമാനം വൻ വിജയം നേടിയിരുന്നു. 2013ലാണ് ഇന്ത്യയിൽ ആദ്യ സോംബി ചിത്രം വരുന്നത്. ദേവകി സിങും ലുക് കെന്നിയും സംയുക്തമായി സംവിധാനം ചെയ്ത ‘റൈസ് ഓഫ് ദി സോംബി’ ബോക്സോഫീസിൽ വിജയിച്ചില്ലങ്കിലും ഇന്ത്യയിലെ ആദ്യ സോംബി ചലച്ചിത്രമെന്ന് ചരിത്രത്തിൽ രേഖപ്പെടുത്തപ്പെട്ടു.
പിന്നീട് തമിഴിലും തെലുങ്കിലുമെല്ലാം ഇത്തരം ചിത്രങ്ങൾ വന്നിട്ടുണ്ട്. മലയാളത്തിൽ ആദ്യമായാണ് ഈ ജോണറിൽ (സ്വഭാവത്തിൽ) ഒരു ചിത്രം വരുന്നത്. പ്രശസ്ത തമിഴ് ചലച്ചിത്രകാരന് പാർഥിപന്റെ ശിഷ്യനാണ് സംവിധായകൻ കിരണ് മോഹൻ.
Most Read: സൂര്യ നിർമിക്കുന്ന ചിത്രത്തിൽ നായികയായി രജിഷ വിജയൻ എത്തുന്നു