കോഴിക്കോട്: വെള്ളിമാടുകുന്ന് ഗവ. ചിൽഡ്രൻസ് ഹോമിൽ നിന്ന് രക്ഷിതാക്കൾക്കൊപ്പം വിട്ടയച്ച പെൺകുട്ടിയെ വീണ്ടും കാണാതായതായി പരാതി. സ്കൂളിലേക്ക് പോയ പെൺകുട്ടി വീട്ടിൽ തിരിച്ചെത്തിയില്ലെന്നാണ് പരാതി. പെൺകുട്ടി സ്കൂളിൽ എത്തിയില്ലെന്ന വിവരം അധ്യാപികയാണ് രക്ഷിതാക്കളെ വിളിച്ചറിയിച്ചത്. സംഭവത്തിൽ വെള്ളയിൽ പോലീസ് അന്വേഷണം ആരംഭിച്ചിട്ടുണ്ട്.
ഇന്ന് രാവിലെ വീട്ടിൽ നിന്ന് സ്കൂളിലേക്ക് പോയതാണ് പെൺകുട്ടി. എന്നാൽ, കുട്ടി സ്കൂളിൽ എത്തിയിരുന്നില്ല. അധ്യാപകർ നടത്തിയ പരിശോധനയിലാണ് കുട്ടി എത്തിയിട്ടില്ലെന്ന വിവരം മനസിലായത്. തുടർന്ന് രക്ഷിതാക്കളെ വിവരം അറിയിക്കുകയായിരുന്നു. രക്ഷിതാക്കളും സ്കൂൾ അധികൃതരും ചേർന്ന് നഗരത്തിൽ പരിശോധന നടത്തിയെങ്കിലും കുട്ടിയെ കണ്ടെത്താനായില്ല.
ഇതോടെ വെള്ളയിൽ പോലീസ് സ്റ്റേഷനിൽ പരാതിയുമായി എത്തുകയായിരുന്നു. മറ്റ് പോലീസ് സ്റ്റേഷനുകളിലേക്കും വിവരം അറിയിച്ചിട്ടുണ്ട്. പോലീസ് നഗരത്തിൽ പരിശോധന നടത്തുകയാണ്. ജനുവരി 26ന് ചിൽഡ്രൻസ് ഹോമിൽ നിന്ന് ചാടിപ്പോയ പെൺകുട്ടികളിൽ ഒരാളെയാണ് വീണ്ടും കാണാതായത്. കഴിഞ്ഞ തവണ കാണാതായി കണ്ടുകിട്ടിയ ശേഷമാണ് പെൺകുട്ടിയെ രക്ഷിതാക്കൾക്കൊപ്പം വിട്ടയച്ചത്.
Most Read: കോഴിക്കോട് ബീച്ചിൽ വീണ്ടും മിന്നൽ പരിശോധന; കടകൾ അടപ്പിക്കുന്നു