വയനാട്: അജ്ഞാത രോഗം ബാധിച്ച് പശുക്കൾ ചാവുന്നതിൽ ക്ഷീര കർഷകർ ആശങ്കയിൽ. കപ്പാടിത്തറ കോടൂർ സ്വദേശി വർക്കിയുടെ മൂന്ന് പശുക്കളാണ് ഇന്നലെ അജ്ഞാത രോഗം ബാധിച്ച് ചത്തത്. ഇന്നലെ രാവിലെ തൊഴുത്തിൽ എത്തിയപ്പോഴാണ് ഒരു പശുവിനെ ചത്ത നിലയിൽ കണ്ടത്. അൽപസമയത്തിനു ശേഷം രണ്ടെണ്ണം കൂടി കുഴഞ്ഞു വീണ് ചാവുകയായിരുന്നു.
ഇദ്ദേഹത്തിന്റെ ഒരു പശുവും കൂടി അവശയായിട്ടുണ്ട്. മൃഗ ഡോക്ടർമാർ സ്ഥലത്തെത്തി പരിശോധന നടത്തി. അവശയായി പശുവിന് കുത്തിവെപ്പും നൽകിയിട്ടുണ്ട്. അജ്ഞാത രോഗം ബാധിച്ച് പശുക്കൾ ചാവുന്നതിൽ പ്രദേശത്തെ ക്ഷീര കർഷകരെല്ലാം ആശങ്കയിലാണ്.
രോഗം എന്തെന്ന് സ്ഥിരീകരിക്കാൻ കഴിഞ്ഞിട്ടില്ലെന്ന് ഡോക്ടർമാർ പറഞ്ഞു. രോഗം സ്ഥിരീകരിക്കുന്നത് വരെ കർഷകർ ജാഗ്രത പാലിക്കണമെന്നും ഡോക്ടർമാർ ആവശ്യപ്പെട്ടു.
Read Also: കളമശേരിയിൽ താറാവുകൾ കൂട്ടത്തോടെ ചത്തൊടുങ്ങുന്നു