ന്യൂഡെൽഹി: യുഎപിഎ കേസിൽ വിദ്യാർഥികളുടെ ജാമ്യം റദ്ദാക്കണമെന്ന ഡെൽഹി പോലീസിന്റെ ആവശ്യം തള്ളി സുപ്രീം കോടതി. ജാമ്യത്തിലിറങ്ങിയ മൂന്ന് വിദ്യാർഥികൾക്കും നോട്ടീസ് അയക്കാൻ കോടതി ഉത്തരവിട്ടു.
ഡെൽഹി ഹൈക്കോടതി ഉത്തരവ് അടിയന്തരമായി സ്‌റ്റേ ചെയ്യണമെന്ന ആവശ്യം നിരാകരിച്ച കോടതി നാലാഴ്‌ചക്കകം മറുപടി നൽകാൻ ആവശ്യപ്പെട്ടുകൊണ്ടാണ് വിദ്യാർഥികൾക്ക് നോട്ടീസ് അയച്ചിരിക്കുന്നത്. അതേസമയം ഡെൽഹി ഹൈക്കോടതി വിധിയെ മറ്റ് കേസുകളിൽ തൽക്കാലം ഉപയോഗിക്കരുതെന്നും സുപ്രീം കോടതി പറഞ്ഞു. സോളിസിറ്റർ ജനറൽ തുഷാർ മേത്ത അതീവ ഗൗരവമുള്ള വിഷയമാണിതെന്ന് സുപ്രീം കോടതിയിൽ അറിയിച്ചു.
ഡെൽഹി കലാപക്കേസിൽ വിദ്യാർഥി നേതാക്കൾക്ക് നൽകിയ ജാമ്യം ഉടൻ സ്‌റ്റേ ചെയ്യണമെന്ന് ആവശ്യപ്പെട്ടാണ് പോലീസ് സുപ്രീം കോടതിയിൽ ഹരജി സമർപ്പിച്ചത്. വിദ്യാർഥി നേതാക്കളെ ജാമ്യത്തിൽ വിടുന്നത് സംഘർഷങ്ങൾക്ക് വഴിവെക്കും എന്നായിരുന്നു പോലീസിന്റെ വാദം.
ഇന്നലെ രാത്രിയോടെയാണ്, പൗരത്വ ബില്ലിനെതിരായ പ്രതിഷേധവുമായി ബന്ധപ്പെട്ട് അറസ്‌റ്റിലായ ജവഹർലാൽ നെഹ്റു സർവകലാശാലയിലെ വിദ്യാർഥിനികളായ നതാഷ നർവാൽ, ദേവാംഗന കലിത, ജാമിയ മിലിയ ഇസ്‌ലാമിയ സർവകലാശാലയിലെ വിദ്യാർഥി ആസിഫ് ഇഖ്ബാൽ തൻഹ എന്നിവർ തിഹാർ ജയിൽ നിന്ന് മോചിതരായത്. ചൊവ്വാഴ്‌ച ജാമ്യം നൽകിയിട്ടും പോലീസ് ഇവരെ മോചിപ്പിക്കാൻ തയ്യാറാവാതെ സുപ്രീം കോടതിയെ സമീപിക്കുകയായിരുന്നു. പിന്നീട് ഹൈക്കോടതി ഇടപെടലിനെ തുടർന്നാണ് ഇവർക്ക് പുറത്തിറങ്ങാനായത്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
