കോട്ടയം: ഏക സിവിൽ കോഡ് സർക്കാരിന്റെ അടിയന്തിര പരിഗണനയിലില്ലെന്ന് കേന്ദ്രമന്ത്രി രാജീവ് ചന്ദ്രശേഖർ പറഞ്ഞു. പാർലമെന്റിന്റെ വർഷകാല സമ്മേളനത്തിൽ ബിൽ അവതരിപ്പിക്കാൻ ആലോചിക്കുന്നില്ലെന്നും അദ്ദേഹം വ്യക്‌തമാക്കി. സുപ്രീം കോടതി ഉൾപ്പടെ നടപ്പിലാക്കാൻ നിർദ്ദേശിച്ചിട്ടും രാഷ്‌ട്രീയപ്രീണനം മൂലം ഏക വ്യക്‌തിനിയമം നടപ്പിലാക്കാൻ സാധിച്ചിട്ടില്ലെന്നാണ് പ്രധാനമന്ത്രി ചൂണ്ടിക്കാട്ടിയതെന്നും അദ്ദേഹം പറഞ്ഞു.
നിയമം ഉടൻ നടപ്പിലാക്കാൻ പോകുന്നെന്നോ എപ്പോൾ നടപ്പിലാക്കുമെന്നോ പ്രധാനമന്ത്രി പറഞ്ഞിട്ടില്ല. കാര്യമറിയാതെയുള്ള കോലാഹലങ്ങളാണ് എങ്ങും നടക്കുന്നതെന്നും കേന്ദ്രമന്ത്രി പറഞ്ഞു. അതേസമയം, പാർട്ടി അവസരം നൽകിയാൽ ലോക്‌സഭാ തിരഞ്ഞെടുപ്പിൽ കേരളത്തിൽ മൽസരിക്കാൻ താൽപര്യമുണ്ടെന്നും രാജീവ് ചന്ദ്രശേഖർ വ്യക്‌തമാക്കി.
ബാലഗോകുലം സംസ്‌ഥാന സമ്മേളനം ഉൽഘാടനം ചെയ്‌ത ശേഷം മാദ്ധ്യമപ്രവർത്തകരോട് പ്രതികരിക്കുക ആയിരുന്നു അദ്ദേഹം. മണിപ്പൂർ സംഭവത്തിൽ കേന്ദ്ര സർക്കാർ ഉത്തരവാദിത്തത്തോടെയാണ് പെരുമാറുന്നതെന്നും അദ്ദേഹം കൂട്ടിച്ചേർത്തു.
Most Read: ‘ബുദ്ധിയില്ലാത്തവരായി സിപിഎം മാറി’; അത്‌ഭുതമെന്ന് വിഡി സതീശൻ
