ഇന്ത്യന് ക്രിക്കറ്റ് ടീം ക്യാപ്റ്റന് വിരാട് കോഹ്ലിക്ക് മൈതാനത്ത് മാത്രമല്ല അതിനു പുറത്തും റെക്കോര്ഡുകള് സൃഷ്ടിക്കാന് സാധിക്കും. ചൊവ്വാഴ്ചയോടെ ഇന്സ്റ്റഗ്രാമില് 75 മില്യണ് ആളുകള് പിന്തുടരുന്ന ആദ്യ ഏഷ്യക്കാരനായി മാറിയിരിക്കുകയാണ് താരം. 56 മില്യണ് ഫോളോവേഴ്സ് ഉള്ള ബോളിവുഡ് നടി പ്രിയങ്ക ചോപ്രയെയും 52 മില്യണ് ഫോളോവേഴ്സുള്ള ദീപിക പദുക്കോണിനെയും പിന്നിലാക്കിയാണ് കോഹ്ലി റെക്കോര്ഡ് സൃഷ്ടിച്ചിരിക്കുന്നത്. നേരത്തെ പ്രമുഖ സംഗീതജ്ഞ കാര്ഡി ബിയെയും ഫോളോവേഴ്സിന്റെ എണ്ണത്തില് കോഹ്ലി മറികടന്നിരുന്നു.
ഏറ്റവും കൂടുതല് ആളുകള് പിന്തുടരുന്ന ആദ്യ 40 പേരുടെ പട്ടികയില് ഏക ഏഷ്യക്കാരനാണ് കോഹ്ലി. ക്രിക്കറ്റ് താരങ്ങളില് ഒന്നാമതുള്ള അദ്ദേഹം മൊത്തപ്പട്ടികയില് 29-ാം സ്ഥാനത്താണ്. ക്രിസ്റ്റ്യാനോ റൊണാള്ഡോ, ലയണല് മെസ്സി, നെയ്മര് എന്നിവര്ക്ക് ശേഷം കായികതാരങ്ങളില് ഏറ്റവും കൂടുതല് പേര് പിന്തുടരുന്നവരില് നാലാം സ്ഥാനവും കോഹ്ലിക്കാണ്. ഇന്സ്റ്റഗ്രാമിലെ സ്പോണ്സര് പോസ്റ്റുകളില് മുമ്പില് നില്ക്കുന്നവരില് വിരാട് കോഹ്ലിയും ഉള്പ്പെടുന്നു. മാര്ച്ച് മുതല് മെയ് വരെ സോഷ്യല് മീഡിയ സൈറ്റില് സ്പോണ്സര് ചെയ്ത പോസ്റ്റുകളില് നിന്ന് 3.6 കോടിയോളം രൂപയാണ് അദ്ദേഹം നേടിയത്.
സെപ്തംബര് 19 മുതല് ആരംഭിക്കുന്ന ഇന്ത്യന് പ്രീമിയര് ലീഗിന്റെ (ഐപിഎല്) പതിമൂന്നാം സീസണിലേക്ക് തയ്യാറെടുക്കുകയാണ് കോഹ്ലി ഇപ്പോള്.