മലപ്പുറം: ‘ജലമാണ് ജീവന്‘ എന്ന ശീര്ഷകത്തില് എസ്വൈഎസ് സംസ്ഥാന കമ്മിറ്റി മാര്ച്ച് 21 മുതൽ മെയ് 31 വരെ ജലസംരക്ഷണ ക്യാംപയിൻ സംഘടിപ്പിക്കുന്നു. പെരിന്തൽമണ്ണ അങ്ങാടിപ്പുറം ‘ഒറോടം തോട്‘ ശുചീകരണത്തോടെ ക്യാംപയിനിന്റെ മലപ്പുറം ഈസ്റ്റ് ജില്ലാതല ശുചീകരണ യജ്ഞത്തിന് തുടക്കമാവുമെന്ന് എസ്വൈഎസ് മലപ്പുറത്ത് നടത്തിയ വാർത്താ സമ്മേളനത്തിൽ പറഞ്ഞു.
രാവിലെ 8ന് അങ്ങാടിപ്പുറം ഒറോടം പാലത്തിന് സമീപം നടക്കുന്ന പരിപാടി എസ്വൈഎസ് സംസ്ഥാന സെക്രട്ടറി എം അബൂബക്കർ മാസ്റ്റർ പടിക്കൽ ഉൽഘാടനം ചെയ്യും. ജില്ലാ പ്രസിഡണ്ട് സികെ ഹസൈനാർ സഖാഫി കുട്ടശ്ശേരി അധ്യക്ഷത വഹിക്കും. പ്രമുഖ പരിസ്ഥിതി പ്രവർത്തകൻ ‘കെ സഹദേവൻ തൃശൂർ‘ ഉൽഘാടന ചടങ്ങിൽ മുഖ്യാതിഥിയാകും.
സയ്യിദ് ഹബീബ് കോയ തങ്ങൾ ചെരക്കാപറമ്പ്, കേരള മുസ്ലിം ജമാഅത്ത് ജില്ല ജനറൽ സെക്രട്ടറി പിഎം. മുസ്തഫ കോഡൂർ, സിവൈഎസ്പി ദേവസ്യ, അങ്ങാടിപ്പുറം ഗ്രാമ പഞ്ചായത്ത് വൈസ് പ്രസിഡണ്ട് കറുമുക്കിൽ ഷബീർ, വാർഡ് മെമ്പർ പേരയിൽ ഷിഹാദ്, എസ്വൈഎസ് ജില്ലാ ജനറൽ സെക്രട്ടറി വിപിഎം ഇസ്ഹാഖ്, അബ്ദുറഹീം കരുവള്ളി, സയ്യിദ് ശിഹാബ് അഹ്സനി, മുഈനുദ്ദീൻ സഖാഫി വെട്ടത്തൂർ, സയ്യിദ് മുർതള ശിഹാബ് സഖാഫി, സിദ്ദീഖ് സഖാഫി വഴിക്കടവ്, ടി യൂസുഫ് സഅദി പൂങ്ങോട്, പിപി മുജീബ്റഹ്മാൻ വടക്കേമണ്ണ, പികെ മുഹമ്മദ് ഷാഫി എന്നിവർ ചടങ്ങിൽ സംസാരിക്കും.
ക്യാംപയിനിന്റെ ഭാഗമായി ജില്ലയിലെ 11 പ്രധാന ജലാശയങ്ങളാണ് ശുചീകരിക്കുക. ജില്ലയിലെ 11 സോണ് കമ്മിറ്റികളുടെ നേതൃത്വത്തില് മുഴുവന് പ്രവര്ത്തകരുടെയും പങ്കാളിത്തത്തോടെയാണ് പദ്ധതി നടപ്പിലാക്കുന്നത്.
അങ്ങാടിപ്പുറത്തിന് പുറമെ എടക്കര പുന്നപ്പുഴ, നിലമ്പൂര് ഓടായിക്കല് പാലം, വണ്ടൂര് കോട്ടക്കുന്ന് കുളം, മലപ്പുറം, മഞ്ചേരി സോണുകളിൽ കടലുണ്ടിപ്പുഴ, അരീക്കോട് ചെങ്ങര ചക്കളത്തിങ്ങല്, കൊണ്ടോട്ടി തള്ളച്ചിറ തോട്, എടവണ്ണപ്പാറ മൂഴിക്കൽ തോട്, കൊളത്തൂര് തൂതപ്പുഴ, പുളിക്കൽ ഐക്കരപ്പടി തിരുണ്ടി തോട് എന്നീ കേന്ദ്രങ്ങളിലെ ജലാശയങ്ങളാണ് ശുചീകരിക്കുക. എസ്വൈഎസ് പ്രവര്ത്തകര്ക്ക് പുറമെ സാമൂഹിക സാംസ്കാരിക രംഗത്തെ പ്രമുഖരും പങ്കാളികളാകും; ഭാരവാഹികൾ അറിയിച്ചു.
‘പറവകള്ക്കൊരു തണ്ണീര്കുടം’ എന്ന പേരിൽ പ്രവര്ത്തകരുടെ വീടുകളില് പക്ഷികള്ക്കും മറ്റിതര ജീവികള്ക്കും കുടിവെള്ള സൗകര്യമൊരുക്കും. ജില്ലയില് 25000 തണ്ണീര്കുടങ്ങള് സ്ഥാപിക്കും. പള്ളികൾ, മദ്രസകൾ, പൊതു സ്ഥലങ്ങൾ എന്നിവിടങ്ങളിൽ ജല സംരക്ഷണ ബോധവത്കരണ പരിപാടികൾ സംഘടിപ്പിക്കും.
പൊതു സ്ഥലങ്ങളിൽ ‘തണ്ണീർ പന്തൽ’ എന്ന പേരിൽ കുടിവെള്ള സംവിധാനം ഏർപ്പെടുത്തും. ജലക്ഷാമമുള്ള സ്ഥലങ്ങളിൽ എസ്വൈഎസ് സര്ക്കിള് ഘടകത്തിന്റെ നേതൃത്വത്തില് സൗജന്യ കുടിവെള്ളം വിതരണം ചെയ്യും. രൂക്ഷമാകുന്ന കുടിവെള്ള പ്രതിസന്ധിക്ക് പരിഹാരമായി കിണര് റീചാര്ജിംഗ് കൂടുതല് കാര്യക്ഷമമായി നടപ്പിലാക്കും; ഭാരവാഹികൾ പത്ര സമ്മേളനത്തിൽ പറഞ്ഞു.
എസ്വൈഎസ് മലപ്പുറം ഈസ്റ്റ് ജില്ലാ പ്രസിഡണ്ട് സികെ ഹസൈനാർ സഖാഫി കുട്ടശ്ശേരി, ജില്ലാ ജനറൽ സെക്രട്ടറി വിപിഎം ഇസ്ഹാഖ്, സാമൂഹിക കാര്യ സെക്രട്ടറി ടി സിദ്ദീഖ് സഖാഫി, പബ്ളിക് റിലേഷൻ സെക്രട്ടറി പിപി മുജീബ്റഹ്മാൻ വടക്കേമണ്ണ എന്നിവർ വാർത്താ സമ്മേളനത്തിൽ പങ്കെടുത്തു.
Most Read: പാലക്കാട്ടെ കാല് കഴുകൽ വിവാദം; ‘ഭരണഘടനക്കും ജനാധിപത്യത്തിനും എതിരെന്ന്’ ബിനോയ് വിശ്വം