തിരുവനന്തപുരം : സംസ്‌ഥാനത്ത് കോവിഡ് വാക്‌സിനേഷനിൽ വയനാട് ജില്ല ഒന്നാമത്. ജൂലൈ 6ആം തീയതി വരെയുള്ള കണക്കുകൾ പ്രകാരമാണ് വയനാട് ജില്ല വാക്‌സിനേഷനിൽ ഒന്നാം സ്‌ഥാനത്ത് എത്തിയത്. ജില്ലയിൽ ഇതിനോടകം തന്നെ 100 ശതമാനം ഹെൽത്ത് കെയർ വർക്കർമാർക്കും ഒന്നാം ഡോസ് കോവിഡ് വാക്‌സിനും, 87 ശതമാനം പേർക്ക് രണ്ടാം ഡോസ് വാക്‌സിനും നൽകാൻ കഴിഞ്ഞതോടെയാണ് ജില്ല സംസ്‌ഥാന തലത്തിൽ ഒന്നാം സ്‌ഥാനത്തെത്തിയത്.
ഇതിനൊപ്പം തന്നെ 45 വയസിന് മുകളിൽ പ്രായമുള്ള ആളുകളിലെ വാക്‌സിനേഷനിലും ജില്ല ഒന്നാം സ്‌ഥാനത്ത് തന്നെയാണ്. ഈ പ്രായപരിധിയിലുള്ള 99 ശതമാനം ആളുകൾക്ക് ഒന്നാം ഡോസ് വാക്‌സിനും, 36 ശതമാനം ആളുകൾക്ക് രണ്ടാം ഡോസ് വാക്‌സിനും ജില്ലയിൽ വിതരണം ചെയ്‌തിട്ടുണ്ട്‌. കൂടാതെ ജില്ലയിൽ വാക്‌സിൻ സ്വീകരിക്കാൻ അർഹതയുള്ള ആളുകളിൽ 57 ശതമാനം പേരും ഇതിനോടകം ഒന്നാം ഡോസ് വാക്‌സിനും, 19 ശതമാനം ആളുകൾ രണ്ടാം ഡോസ് വാക്‌സിനും സ്വീകരിച്ചു കഴിഞ്ഞു.
വാക്‌സിനേഷൻ ഉൾപ്പടെയുള്ള കോവിഡ് പ്രതിരോധ പ്രവർത്തനങ്ങൾ ആത്‌മാർഥമായി നിർവഹിക്കുന്ന ജനപ്രതിനിധികള്‍, ആരോഗ്യവകുപ്പ് ജീവനക്കാര്‍, പൊതു സ്വകാര്യ മേഖലകളിലെ ആരോഗ്യ പ്രവര്‍ത്തകരും സ്‌ഥാപനങ്ങളും, സന്നദ്ധ സംഘടനകള്‍, അധ്യാപകര്‍, വിവിധ വകുപ്പ് ഉദ്യോഗസ്‌ഥര്‍ തുടങ്ങിയവർ അഭിനന്ദനം അർഹിക്കുന്നതായി ജില്ലാ കളക്‌ടർ വ്യക്‌തമാക്കി.
Read also : ‘സിക’ പിടികൂടുന്നത് ഗർഭിണികളെ; എങ്ങനെ പ്രതിരോധിക്കാം? ശ്രദ്ധിക്കേണ്ട കാര്യങ്ങൾ
