തിരുവനന്തപുരം: സംസ്ഥാനത്ത് കോവിഡ് കേസുകള് ചെറുതായി ഉയര്ന്നെങ്കിലും ആശങ്കപ്പെടേണ്ടതില്ലെന്ന് ആരോഗ്യ വകുപ്പ് മന്ത്രി വീണാ ജോര്ജ്. ഇപ്പോള് ബാധിച്ചിരിക്കുന്നത് ഒമൈക്രോണ് വകഭേദമാണ്. പരിശോധനകളില് മറ്റ് വകഭേദങ്ങള് കണ്ടെത്തിയിട്ടില്ലെന്നും മന്ത്രി അറിയിച്ചു.
കോവിഡിനോടൊപ്പം ജീവിക്കുക എന്നതാണ് പ്രധാനം. എല്ലാവരും മാസ്ക് നിര്ബന്ധമായും ധരിക്കുക. കിടപ്പ് രോഗികള്, വയോജനങ്ങള് എന്നിവരെ സംരക്ഷിക്കാനുള്ള പ്രവര്ത്തനങ്ങള് നടത്തണം. രണ്ടാം ഡോസ് വാക്സിന് എടുക്കാനുള്ളവരും പ്രിക്കോഷന് ഡോസ് എടുക്കാനുള്ളവരും അതെടുക്കേണ്ടതാണ്. ആരോഗ്യ പ്രവര്ത്തകര് നിര്ബന്ധമായും പ്രിക്കോഷന് ഡോസ് എടുക്കണം. വളരെ ശക്തമായ ബോധവൽക്കരണം നടത്തണമെന്നും മന്ത്രി നിര്ദ്ദേശിച്ചു. മന്ത്രിയുടെ നേതൃത്വത്തില് നടന്ന ഉന്നതതല യോഗത്തിലാണ് നിര്ദ്ദേശം.
സംസ്ഥാനത്തേയും ജില്ലകളുടേയും കോവിഡ് സ്ഥിതി യോഗം വിലയിരുത്തി. എറണാകുളം, തിരുവനന്തപുരം, കോട്ടയം ജില്ലകളിലാണ് കോവിഡ് കേസുകള് കൂടുതല്. ആ ജില്ലകള് പ്രത്യേകം ശ്രദ്ധിക്കണം. രോഗലക്ഷണങ്ങളുള്ളവര് പരിശോധന നടത്തണം; മന്ത്രി പറഞ്ഞു.
വാക്സിനേഷന്റെ പുരോഗതിയും ചര്ച്ച ചെയ്തു. കോവിഡ് കുറഞ്ഞതോടെ പലരും രണ്ടാം ഡോസ് വാക്സിനും പ്രിക്കോഷന് ഡോസും എടുക്കാന് വിമുഖത കാണിക്കുന്നുണ്ട്. അത് ആപത്തുണ്ടാക്കാം. രണ്ട് ഡോസ് വാക്സിനും പ്രിക്കോഷന് ഡോസും കൃത്യമായ ഇടവേളകളില് എടുത്താല് മാത്രമേ ഫലം ലഭിക്കൂ. കോവിഡ് മരണം സംഭവിക്കുന്നവരില് വാക്സിനെടുക്കാത്തവരുടെയും അനുബന്ധ രോഗങ്ങളുള്ളവരുടേയും എണ്ണം കൂടുതലായി കാണുന്നു എന്നാണ് വിലയിരുത്തല്. അനുബന്ധ രോഗങ്ങളുള്ളവര്ക്ക് കോവിഡ് രോഗ ലക്ഷണങ്ങളുണ്ടെങ്കില് ഉടന് തന്നെ കോവിഡ് പരിശോധന നടത്തി ചികിൽസ തേടേണ്ടതാണെന്നും മന്ത്രി വ്യക്തമാക്കി.
എല്ലാ കുട്ടികള്ക്കും വാക്സിന് ഉറപ്പാക്കും. സ്കൂള് തുറന്ന സാഹചര്യത്തില് എല്ലാ കുട്ടികള്ക്കും വാക്സിനെടുക്കാനുള്ള നടപടികള് വിദ്യാഭ്യാസ വകുപ്പുമായി ആലോചിച്ച് നടപ്പിലാക്കുന്നതാണ്. പകര്ച്ച വ്യാധികള്ക്കെതിരേയും പ്രത്യേകിച്ച് നിപ വൈറസിനെതിരേയും പേ വിഷബാധയ്ക്കെതിരെയും ജാഗ്രത വേണമെന്നും മന്ത്രി പറഞ്ഞു.
അതേസമയം 18 വയസ് മുതലുള്ള 100 ശതമാനം പേരും ആദ്യ ഡോസ് വാക്സിന് എടുത്തെങ്കിലും രണ്ടാം ഡോസ് വാക്സിനേഷന് 88 ശതമാനമാണെന്ന് മന്ത്രി ചൂണ്ടിക്കാട്ടി. 22 ശതമാനം പേരാണ് പ്രിക്കോഷന് ഡോസ് എടുത്തത്. 15 മുതല് 17 വയസുവരെയുള്ള 83 ശതമാനം കുട്ടികള്ക്ക് ആദ്യ ഡോസും 55 ശതമാനം കുട്ടികള്ക്ക് രണ്ടാം ഡോസും നല്കിയിട്ടുണ്ട്. 12 മുതല് 14 വയസുവരെയുള്ള 54 ശതമാനം കുട്ടികള്ക്ക് ആദ്യ ഡോസ് വാക്സിനും 15 ശതമാനം കുട്ടികള്ക്ക് രണ്ടാം ഡോസും നല്കിയിട്ടുണ്ട്. പ്രദേശികമായി വാക്സിന് എടുക്കാത്തവരുടെ കണക്ക് ശേഖരിക്കാനും വാക്സിന് എടുക്കുന്നു എന്നുറപ്പാക്കാനും ഫീല്ഡ് വര്ക്കര്മാരെ ചുമതലപ്പെടുത്തുമെന്ന് മന്ത്രി അറിയിച്ചു.
Most Read: നാഷണല് ഹെറാള്ഡ് കേസ്: ജൂണ് 13ന് ഹാജരാകാന് രാഹുലിന് ഇഡി നോട്ടീസ്