ഗ്വാളിയോര്‍: ഭര്‍ത്താവ് ബലമായി ആസിഡ് കുടിപ്പിച്ച 25കാരി ഗുരുതരാവസ്‌ഥയിൽ ആശുപത്രിയില്‍. മധ്യപ്രദേശിലെ ഗ്വാളിയാര്‍ ജില്ലയില്‍ രാംഗഡിലാണ് സംഭവം നടന്നത്. കഴിഞ്ഞ ജൂൺ 28ന് ഭര്‍ത്താവും സഹോദരിയും ചേര്‍ന്നാണ് യുവതിയെ ബലമായി ആസിഡ് കുടിപ്പിച്ചത്. തുടർന്ന് പ്രദേശത്തെ ആശുപത്രിയില്‍ പ്രവേശിപ്പിച്ചിരുന്നു എങ്കിലും ആരോഗ്യ നില മേശമായതോടെ വിദഗ്‌ധ ചികിൽസക്കായി യുവതിയെ ഡെൽഹിയിലേക്ക് മാറ്റി.
ഡെല്‍ഹി വനിതാ കമ്മീഷന് അധ്യക്ഷ സ്വാതി മാലിവല്‍ മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാന് കത്തയച്ചതിനെ തുടർന്നാണ് ക്രൂരത പുറത്തറിയുന്നത്. യുവതിയുടെ ആമാശയം, കുടല്‍ എന്നിവ പൂര്‍ണമായും പൊള്ളലേറ്റ നിലയിലാണ്. ഒന്നും കുടിക്കാനോ ഭക്ഷിക്കാനോ സാധിക്കാത്ത അവസ്‌ഥയിലാണെന്നും സ്വാതി മാലിവാള്‍ പറഞ്ഞു.
ഭര്‍ത്താവിന് മറ്റൊരു സ്‍ത്രീയുമായി ബന്ധമുള്ളതായും തന്നെ ക്രൂരമായി മര്‍ദ്ദിച്ചിരുന്നതായും യുവതി വനിതാ കമ്മീഷന് മൊഴി നൽകിയിരുന്നു. സംഭവം നടന്ന് അഞ്ചുദിവസത്തിന് ശേഷമാണ് യുവതിയുടെ മാതാവിന്റെ പരാതിയില്‍ പോലീസ് കേസ് രജിസ്‌റ്റര്‍ ചെയ്‌തത്‌.
