പോർട്ടോ: ലോകകപ്പ് യോഗ്യതാ മൽസരങ്ങളിൽ പോർച്ചുഗലിനും ഡെൻമാർക്കിനും ജയം. ലോക ചാമ്പ്യൻമാരായ ഫ്രാൻസിനും നെതർലൻഡിനും ക്രയേഷ്യക്കും സമനില കുരുക്ക്. ക്രിസ്റ്റ്യാനോ റൊണാൾഡോയുടെ ഇരട്ട ഗോളിൽ പോർച്ചുഗൽ 2-1ന് അയർലണ്ടിനെ തോൽപ്പിച്ചു. സ്കോട്ലൻഡിന് എതിരെ മറുപടിയില്ലാത്ത 2 ഗോളുകൾക്കായിരുന്നു ഡെൻമാർക്കിന്റെ ജയം.
ബോസ്നിയ ആൻഡ് ഹെർസഗോവിനയാണ് ലോക ചാമ്പ്യൻമാരായ ഫ്രാൻസിന് 1-1ന് സമനില പൂട്ടിട്ടത്. മൽസരത്തിന്റെ 51ആം മിനുട്ടിൽ ഫ്രഞ്ച് താരം കൗണ്ടേ ചുവപ്പ് കാർഡ് കണ്ട് പുറത്തായി. 20ആം മിനിറ്റിൽ ഹാലണ്ടിന്റെ ഗോളിൽ മുന്നിലെത്തിയ നോർവെക്ക് എതിരെ ക്ളാസന്റെ ഗോളിൽ നെതർലൻഡ് സമനില പിടിച്ചു.
റഷ്യ ക്രയേഷ്യയെ ഗോൾരഹിത സമനിലയിൽ തളച്ചു. ഇന്ന് നടക്കുന്ന മൽസരങ്ങളിൽ ഇംഗ്ളണ്ട് ഹംഗറിയെയും, ഇറ്റലി ബൾഗേറിയയെയും, ചെക്ക് റിപ്പബ്ളിക്ക് ബെലാറസിനെയും നേരിടും. മുൻ ലോക ചാമ്പ്യൻമാരായ ജർമനിക്ക് ലീച്ചെൻസ്റ്റെയിനും ബെൽജിയത്തിന് എസ്തോണിയയും സ്പെയിനിന് സ്വീഡനുമാണ് എതിരാളി.
Read Also: ‘വാരിയംകുന്നനി’ൽ ആഷികും പൃഥ്വിരാജും ഇനിയില്ല; ഇരുവരും പിൻമാറി