രാജാക്കാട്: ഇടുക്കിയിലെ പൂപ്പാറയിൽ ഇതര സംസ്ഥാനക്കാരിയായ പെൺകുട്ടിയെ കൂട്ടബലാൽസംഗം ചെയ്ത കേസിൽ ഒളിവിലായിരുന്ന രണ്ടുപ്രതികൾ കൂടി പോലീസ് പിടിയിൽ. പൂപ്പാറ സ്വദേശികളായ ശിവ, സുഗന്ധ് എന്നിവരെ തമിഴ്നാട്ടിൽ നിന്നാണ് പോലീസ് പിടികൂടിയത്. പീഡനത്തിനിരയായ പെൺകുട്ടിയുടെ രണ്ട് സുഹൃത്തുക്കൾ ഇപ്പോഴും പോലീസ് കസ്റ്റഡിയിലാണ്.
കേസിൽ ആകെ ആറ് പേരാണ് ഇതുവരെ അറസ്റ്റിലായത്. പൂപ്പാറ സ്വദേശികളായ സാമുവൽ, അരവിന്ദ് കുമാർ, പ്രായപൂർത്തിയാകാത്ത രണ്ടുപേർ എന്നിവരെ തിങ്കളാഴ്ച അറസ്റ്റ് ചെയ്ത് റിമാൻഡ് ചെയ്തിരുന്നു. നാലുപേർ തന്നെ ബലാൽസംഗം ചെയ്തുവെന്നും രണ്ടുപേർ അതിന് സഹായം നൽകുകയും സുഹൃത്തിനെ മർദ്ദിക്കുകയും ചെയ്തുവെന്നാണ് പെൺകുട്ടിയുടെ പരാതി. പ്രതികളെ തിരിച്ചറിഞ്ഞിട്ടുണ്ട്.
തേയിലത്തോട്ടത്തിൽ സുഹൃത്തിനൊപ്പം സംസാരിക്കുകയായിരുന്ന പശ്ചിമ ബംഗാൾ സ്വദേശിയായ പതിനഞ്ചുകാരിയെ പൂപ്പാറ സ്വദേശികളായ നാല് പേരാണ് ആക്രമിച്ചത്. സുഹൃത്തിനെ മര്ദ്ദിക്കുകയും പെൺകുട്ടിയെ ലൈംഗികാതിക്രമത്തിന് ഇരയാക്കുകയും ചെയ്തു. ദൃക്സാക്ഷികൾ നൽകിയ വിവരങ്ങളുടെ അടിസ്ഥാനത്തിൽ തിങ്കളാഴ്ച നാലുപേരെ കസ്റ്റഡിയിൽ എടുത്തിരുന്നു. ഇതിനിടെ ശിവയും സുഗന്ധും തമിഴ്നാട്ടിലേക്ക് കടന്നുകളഞ്ഞു. തുടർന്ന് പോലീസ് സംഘം തമിഴ്നാട്ടിൽ എത്തിയാണ് ഇരുവരെയും പിടികൂടിയത്.
Most Read: തൃക്കാക്കരയിൽ കള്ളവോട്ട് ശ്രമം സ്ഥിരീകരിച്ച് റിപ്പോർട്; പ്രതിയുടെ അറസ്റ്റ് രേഖപ്പെടുത്തി