ചെന്നൈ: തമിഴ്‌നാട്ടിൽ കത്തിമുനയിൽ നിർത്തി പീഡിപ്പിക്കാൻ ശ്രമിച്ച യുവാവിനെ 19കാരി കുത്തി കൊലപ്പെടുത്തി. തിരുവള്ളൂർ ജില്ലയിലെ ചോളവാരം പോലീസ് സ്‌റ്റേഷൻ പരിധിയിൽ ശനിയാഴ്‌ചയാണ് സംഭവം.
തിരുവള്ളൂരിൽ നിന്നുള്ള പെൺകുട്ടി ചോളവാരത്തുള്ള ബന്ധുവിന്റെ വീട്ടിൽ വന്നതായിരുന്നു. വൈകിട്ട് വീടിന് പുറത്ത്, കുതിര ഫാമിന് സമീപമുള്ള ടോയ്‌ലറ്റിൽ പോകുന്നതിനിടെ 26കാരനായ അജിത് എന്ന കില്ലി അജിത് പെൺകുട്ടിയെ ഉപദ്രവിക്കാൻ ശ്രമിക്കുകയായിരുന്നു എന്ന് പോലീസ് പറഞ്ഞു.
“കത്തി കാണിച്ച് ഭീഷണിപ്പെടുത്തി ഉപദ്രവിക്കാൻ ശ്രമിക്കവേ സ്വയരക്ഷക്കായി പെൺകുട്ടി ഇയാളെ തള്ളിമാറ്റി. തെറിച്ചു വീണ അജിത്തിൽ നിന്ന് പെൺകുട്ടി കത്തി കൈക്കലാക്കുകയും മുഖത്തും കഴുത്തിലും കുത്തി പരിക്കേൽപ്പിക്കുകയും ആയിരുന്നു. കുത്തേറ്റ അജിത് സംഭവ സ്‌ഥലത്ത് തന്നെ മരിച്ചിരുന്നു”- പോലീസ് ഉദ്യോഗസ്‌ഥൻ പറഞ്ഞു.
പെണ്‍കുട്ടിയുടെ മൊഴിപ്രകാരമുള്ള പ്രാഥമിക നിഗമനം മാത്രമാണ് ഇതെന്നും സംഭവത്തില്‍ വിശദമായ അന്വേഷണം നടന്നുവരികയാണെന്നും ചോളവാരം പോലീസ് പറഞ്ഞു. സംഭവത്തിന് ദൃക്‌സാക്ഷികൾ ഉണ്ടോ എന്നും പരിശോധിക്കുന്നുണ്ടെന്ന് പോലീസ് കൂട്ടിച്ചേർത്തു.
Also Read: വിശദീകരണം ചോദിക്കേണ്ടത് തന്നോട്, ഉദ്യോഗസ്‌ഥരോടല്ല; പഞ്ചാബ് ഗവർണർക്കെതിരെ മുഖ്യമന്ത്രി
