ദോഹ : കോവിഡ് വ്യാപനം നിലനിൽക്കുന്ന സാഹചര്യത്തിൽ നിയന്ത്രണങ്ങൾ ലംഘിക്കുന്ന ആളുകൾക്കെതിരെ കർശന നടപടി സ്വീകരിച്ച് ഖത്തർ ആഭ്യന്തര മന്ത്രാലയം. ഇതേ തുടർന്ന് നിയമലംഘനം നടത്തിയ 193 പേർ കൂടി പിടിയിലായതായി അധികൃതർ വ്യക്‌തമാക്കി. പിടികൂടിയ ആളുകളിൽ ഏറെപ്പേരും പൊതു സ്‌ഥലങ്ങളിൽ മാസ്‌ക് ധരിക്കാത്തവരാണ്.
മാസ്‌ക് ധരിക്കാത്തതിന് മാത്രം 149 പേർക്കെതിരെയാണ് ഖത്തറിൽ നടപടി സ്വീകരിച്ചത്. കൂടാതെ സുരക്ഷിതമായ സാമൂഹിക അകലം പാലിക്കാതിരുന്ന 43 പേരെയും, മൊബൈലിൽ ഇഹ്തിറാസ് ആപ്ളിക്കേഷൻ ഡൗൺലോഡ് ചെയ്യാതിരുന്ന ഒരാളെയും അറസ്‌റ്റ് ചെയ്‌തിട്ടുണ്ട്‌.
നിയമലംഘനം നടത്തിയതിന് പിടികൂടിയവരെ തുടർ നടപടികൾക്കായി പ്രോസിക്യൂഷന് കൈമാറി. കോവിഡ് നിയന്ത്രണങ്ങൾ ലംഘിച്ചതിന്റെ പേരിൽ ഖത്തറിൽ ഇതിനോടകം 1000ലധികം ആളുകളെയാണ് ഉദ്യോഗസ്‌ഥർ പിടികൂടിയത്.
Read also : സംസ്‌ഥാന വിഭജനം: തമിഴ്‌നാട്ടിൽ കലാപത്തിന് വെടിമരുന്നിടാൻ കേന്ദ്ര ശ്രമം; ഐസക്
