അബുദാബി : യുഎഇയിൽ നിന്നും എയർ ഇന്ത്യയുടെ രണ്ട് സർവീസുകൾ കൂടി പുനഃരാരംഭിക്കാൻ തീരുമാനിച്ചതായി അധികൃതർ വ്യക്‌തമാക്കി. കോവിഡ് വ്യാപനത്തെ തുടർന്ന് നിർത്തി വച്ച രണ്ട് എയർ ഇന്ത്യ എക്സ്പ്രസ് സർവീസുകളാണ് പുനഃരാരംഭിക്കുന്നത്. റാസല്‍ഖൈമ-കോഴിക്കോട്, അല്‍ ഐന്‍-കോഴിക്കോട് എന്നീ സര്‍വീസുകളാണ് പുനഃരാരംഭിക്കുന്നതെന്ന് അധികൃതർ വ്യക്‌തമാക്കി.
മാർച്ച് 31 മുതൽ ഒക്‌ടോബർ 29 വരെയാണ് റാസൽഖൈമ-കോഴിക്കോട് സർവീസുകൾ ഉണ്ടാകുക. ജൂലൈ 1 മുതൽ ഒക്‌ടോബർ 28 വരെയുള്ള ദിവസങ്ങളിൽ അൽ-ഐൻ -കോഴിക്കോട് സർവീസുകളും ഉണ്ടായിരിക്കും. യുഎഇയിൽ നിന്നും സർവീസ് നടത്തുന്ന അന്ന് തന്നെ കോഴിക്കോട് നിന്ന് തിരിച്ചും സർവീസുകൾ ഉണ്ടായിരിക്കും.
നിലവിൽ പുനഃരാരംഭിച്ച രണ്ട് സർവീസുകളിലേക്കും ടിക്കറ്റ് ബുക്കിംഗ് ആരംഭിച്ചു കഴിഞ്ഞു. നേരത്തെ റാസല്‍ഖൈമയില്‍ നിന്ന് കോഴിക്കോട്, കൊച്ചി, തിരുവനന്തപുരം എന്നിവിടങ്ങളിലേക്ക് എയര്‍ ഇന്ത്യ എക്സ്പ്രസ് ആഴ്‌ചയില്‍ രണ്ടു വീതം സര്‍വീസുകള്‍ നടത്തിയിരുന്നു.
Read also : പര്യടനങ്ങളിലൂടെ രാജഗോപാലൻ ജനങ്ങളിലേക്ക്; രണ്ടാം ഘട്ടം ഇന്ന് തുടങ്ങി
