അബുദാബി : യുഎഇയിൽ വീണ്ടും പ്രതിദിന കോവിഡ് വ്യാപനത്തിൽ ഉയർച്ച തുടരുന്നു. കഴിഞ്ഞ 24 മണിക്കൂറിൽ രാജ്യത്ത് 2,101 ആളുകൾക്കാണ് കോവിഡ് സ്‌ഥിരീകരിച്ചത്. ഇതോടെ രാജ്യത്ത് കോവിഡ് സ്‌ഥിരീകരിച്ച ആകെ ആളുകളുടെ എണ്ണം 4,34,465 ആയി ഉയർന്നു. ഒപ്പം തന്നെ കഴിഞ്ഞ 24 മണിക്കൂറിൽ രാജ്യത്ത് കോവിഡ് ബാധിച്ചു 10 പേർ മരിക്കുകയും ചെയ്‌തു. ഇതോടെ നിലവിൽ രാജ്യത്ത് കോവിഡിനെ തുടർന്ന് ജീവൻ നഷ്‌ടമായ ആകെ ആളുകളുടെ എണ്ണം 1,424 ആയി ഉയർന്നു.
അതേസമയം തന്നെ കഴിഞ്ഞ 24 മണിക്കൂറിൽ രാജ്യത്ത് കോവിഡ് ബാധിച്ചു ചികിൽസയിൽ കഴിഞ്ഞിരുന്ന 2,268 ആളുകൾ കൂടി രോഗമുക്‌തരായിട്ടുണ്ട്. നിലവിൽ രാജ്യത്ത് രോഗബാധിതരായ ആകെ ആളുകളിൽ 4,16,105 ആളുകളും രോഗമുക്‌തരായിട്ടുണ്ട്. പ്രതിദിന രോഗബാധിതരേക്കാൾ രോഗമുക്‌തരുടെ എണ്ണത്തിൽ ഉയർച്ച ഉണ്ടായതിനാൽ തന്നെ രോഗബാധിതരായി ചികിൽസയിൽ കഴിയുന്നവരുടെ എണ്ണത്തിൽ കുറവ് രേഖപ്പെടുത്തി.
രാജ്യത്തിന്റെ വിവിധ ഭാഗങ്ങളിലായി നിലവിൽ രോഗബാധിതരായി ചികിൽസയിൽ കഴിയുന്നവരുടെ എണ്ണം 16,936 ആയി കുറഞ്ഞു. ഒപ്പം തന്നെ കഴിഞ്ഞ 24 മണിക്കൂറിനുള്ളിൽ രാജ്യത്ത് 1,98,328 കോവിഡ് പരിശോധനകൾ നടത്തിയതായും, ഇതോടെ രാജ്യത്ത് ഇതുവരെ നടത്തിയ കോവിഡ് പരിശോധനകൾ 3.46 കോടി കവിഞ്ഞതായും ആരോഗ്യ പ്രതിരോധ മന്ത്രാലയം വ്യക്‌തമാക്കി.
Read also : ഒമാൻ; കോവിഡ് മൂന്നാം തരംഗം, വാക്‌സിൻ വിതരണം വേഗത്തിലാക്കാൻ നടപടി
