പാലക്കാട്: കഞ്ചിക്കോട് വാഹന പരിശോധനയ്ക്കിടെ നിർത്താതെ പോയ കാറിൽ നിന്ന് കഞ്ചാവ് പിടികൂടി. നാല് ചാക്കുകളിൽ നിന്നായി നൂറ് കിലോയോളം കഞ്ചാവാണ് പിടിച്ചെടുത്തത്. എക്സൈസ് സംഘത്തിന്റെ വാഹന പരിശോധനയ്ക്കിടെയാണ് സംഭവം. അമിത വേഗത്തിൽ പോയ കാർ ടാങ്കറിലും ബൈക്കിലും ഇടിച്ചിരുന്നു. സംഭവത്തിൽ രണ്ടുപേരെ എക്സൈസ് സംഘം അറസ്റ്റ് ചെയ്തിട്ടുണ്ട്.
അമിതവേഗത്തിൽ ഓടുന്നതിനിടെ ടാങ്കറിലും ബൈക്കിലും ഇടിച്ച് കാറിന്റെ ടയർ പൊട്ടിയിരുന്നു. തുടർന്ന് ഡിവൈഡറിൽ ഇടിച്ചു നിന്ന കാർ എക്സൈസ് കസ്റ്റഡിയിൽ എടുക്കുകയായിരുന്നു. മഞ്ചേരി സ്വദേശികളായ രാജേഷ്, ശിഹാബ് എന്നിവരാണ് പിടിയിലായത്. കാറിൽ നിന്ന് ഇറങ്ങി ഓടാൻ ശ്രമിക്കുന്നതിനിടെയാണ് പ്രതികളെ പിടികൂടിയത്.
അപകടത്തിൽപെട്ട കാർ പൂർണമായും തകർന്നിട്ടുണ്ട്. നാല് ചാക്കുകളിലായി നൂറുകിലോയോളം കഞ്ചാവാണ് പിടികൂടിയത്. സംഭവത്തിൽ എക്സൈസ് സംഘം അന്വേഷണം ആരംഭിച്ചു. പാലക്കാട് എക്സൈസ് സ്പെഷ്യൽ സെൽ ആണ് പരിശോധന നടത്തിയത്. അതേസമയം, അപകടത്തിൽപെട്ട പ്രതികളുടെ പരിക്ക് ഗുരുതരമല്ല.
Most Read: റാഗിങ്ങിന്റെ പേരിൽ ക്രൂരമർദ്ദനം; വിദ്യാർഥി ബോധരഹിതനായത് മണിക്കൂറുകളോളം