തിരുവനന്തപുരം: ഡ്രൈവിങ് ലൈസൻസുമായി ബന്ധപ്പെട്ട മെഡിക്കൽ സർട്ടിഫിക്കറ്റുകൾക്ക് ഓൺലൈൻ സംവിധാനം ഏർപ്പെടുത്തിയതായി ഗതാഗത മന്ത്രി ആന്റണി രാജു. പുതിയ സംവിധാനം വഴി ഡ്രൈവിങ് ലൈസൻസ് നേടാനും പുതുക്കാനും ആവശ്യമായ മെഡിക്കൽ സർട്ടിഫിക്കറ്റുകൾ ഡോക്‌ടർമാർക്ക് തന്നെ ഓൺലൈനിലൂടെ അപ്‌ലോഡ് ചെയ്യാൻ സാധിക്കുമെന്ന് മന്ത്രി അറിയിച്ചു.
ഇതിനായി അംഗീകൃത ഡോക്‌ടർമാർക്ക് മോട്ടോർ വാഹന വകുപ്പിന്റെ സാരഥി പോർട്ടലിൽ രജിസ്‌ട്രേഷൻ സൗകര്യം ഏർപ്പെടുത്തും. രജിസ്‌റ്റർ ചെയ്‌ത ഡോക്‌ടർമാർക്ക് അപേക്ഷകരെ പരിശോധിച്ച ശേഷം മെഡിക്കൽ സർട്ടിഫിക്കറ്റ് ഓൺലൈനിലൂടെ സമർപ്പിക്കാം. സർട്ടിഫിക്കറ്റുകളുടെ നിജസ്‌ഥിതി ഉറപ്പുവരുത്താനും വ്യാജ സർട്ടിഫിക്കറ്റുകൾ പൂർണമായി ഒഴിവാക്കുവാനും ഈ സംവിധാനത്തിലൂടെ സാധിക്കുമെന്നും മന്ത്രി അറിയിച്ചു.
പേപ്പർ രൂപത്തിലുള്ള മെഡിക്കൽ സർട്ടിഫിക്കറ്റുകൾ അപ്‌ലോഡ് ചെയ്യുന്നതിൽ പൊതുജനങ്ങൾക്കുള്ള ബുദ്ധിമുട്ടും ഇതുമൂലം ഒഴിവാകും. മോട്ടോർ വാഹനവകുപ്പിലെ സേവനങ്ങൾ മുഴുവൻ ഓൺലൈൻ ആകുന്നതിന്റെ ഭാഗമായുള്ളതാണ് ഈ സംവിധാനമെന്നും മന്ത്രി കൂട്ടിച്ചേർത്തു.
Most Read: വേനൽമഴയിൽ സംസ്‌ഥാനത്തെ വിവിധ ജില്ലകളിൽ വ്യാപക നാശനഷ്‌ടം
