കൊച്ചി: യുഡിഎഫ് നേതൃയോഗം ഇന്ന് കൊച്ചിയില് നടക്കും. ജോസ് കെ മാണി ഇടതുമുന്നണിയുടെ ഭാഗമായ സാഹചര്യത്തില് മധ്യ കേരളത്തില് സ്വീകരിക്കേണ്ട പുതിയ നിലപാടുകള് യോഗത്തില് ചര്ച്ചയാകും. പഞ്ചായത്ത് തെരഞ്ഞെടുപ്പിലെ സീറ്റ് ധാരണ സംബന്ധിച്ച ജില്ലാ തല ചര്ച്ചകള്ക്കും യുഡിഎഫ് യോഗം രൂപം നല്കും. വെല്ഫെയര് പാര്ട്ടിയുമായുള്ള സഹകരണ നീക്കം ഉയര്ത്തിയ പ്രതിഷേധങ്ങള്ക്ക് നടുവിലാണ് യോഗം നടക്കുന്നത്.
Read also: ബിഹാര് തിരഞ്ഞെടുപ്പ് പ്രചാരണം; പ്രധാനമന്ത്രി ഇന്ന് യോഗത്തില് പങ്കെടുക്കും
ജോസ് കെ മാണിയുടെ ഇടതു മുന്നണി പ്രവേശം യുഡിഫിനെ ബാധിക്കില്ലെന്ന് നേതാക്കള് അവകാശപ്പെടുന്നുണ്ടെങ്കിലും യഥാര്ഥ രാഷ്ട്രീയ സാഹചര്യം വ്യത്യസ്തമാണെന്നാണ് വിലയിരുത്തുന്നത്. അതിനിടയില് വെല്ഫെയര് പാര്ട്ടിയുമായുള്ള സഹകരണ നീക്കവും വിവാദമായിരിക്കുകയാണ്. വെല്ഫെയര് പാര്ട്ടിയുമായി പ്രാദേശിക തലങ്ങളില് പോലും സഹകരിക്കുന്നതിനെതിരെ സമസ്തയും രംഗത്ത് വന്നതോടെ ലീഗും സമര്ദ്ദത്തിലായിരിക്കുകയാണ്. നിര്ണായകമായ ഈ വിഷയങ്ങള്ക്കാവും യോഗത്തില് പ്രാധാന്യം കൊടുക്കുക.
രാവിലെ 10 മണിക്ക് ഡിസിസി ഓഫീസിലാണ് യോഗം. നേതാക്കള് നേരിട്ടും ഓണ്ലൈനായും യോഗത്തില് പങ്കെടുക്കും. പാലാ സീറ്റിന്റെ പേരില് എന്സിപി ഇടതു മുന്നണിയില് നിന്ന് പിണങ്ങി വന്നാല് ഒപ്പം ചേര്ക്കണമെന്ന ധാരണയും കോണ്ഗ്രസിനുണ്ട്. ഈ വിഷയത്തിലും ഇന്ന് ചര്ച്ച നടന്നേക്കും. യുഡിഎഫ് യോഗത്തിന് ശേഷം പുതുതായി നിയമിച്ച ജില്ലാ ചെയര്മാന്മാരുടെയും കണ്വീനര്മാരുടെയും യോഗവും ഇന്ന് നടക്കും.
Read also: സ്വര്ണക്കടത്ത് കേസ്: ശിവശങ്കറിന്റെ മുന്കൂര് ജാമ്യാപേക്ഷ ഇന്ന് വീണ്ടും കോടതിയില്