കോഴിക്കോട്: അരയിടത്തുപാലത്ത് ബസ് മറിഞ്ഞ് അപകടം. ഇരുപതോളം പേർക്ക് പരിക്കേറ്റു. ഒരാളുടെ നില ഗുരുതരമാണ്. പരിക്കേറ്റവരെ ആശുപത്രിയിൽ പ്രവേശിപ്പിച്ചു. അരയിടത്തുപാലം ഗോകുലം മാൾ ഓവർ ബ്രിഡ്ജിന് സമീപമാണ് അപകടം നടന്നത്.
പാളയം ബസ് സ്റ്റാൻഡിൽ നിന്ന് അരീക്കോട് ഭാഗത്തേക്ക് പോവുകയായിരുന്ന ബസാണ് പുതിയ ബസ് സ്റ്റാൻഡിന് സമീപത്ത് വെച്ച് തലകീഴായി മറിഞ്ഞത്. ബസ് അമിതവേഗതയിലായിരുന്നു എന്നാണ് ലഭിക്കുന്ന വിവരം. ബസ് മറ്റൊരു വാഹനത്തിൽ തട്ടി മീഡിയനിൽ ഇടിച്ച് മറിയുകയായിരുന്നുവെന്നാണ് യാത്രക്കാരിൽ നിന്ന് ലഭിക്കുന്ന വിവരം.
തെറ്റായ ദിശയിൽ വന്ന രണ്ട് ബൈക്കുകളെ മറികടക്കാൻ ശ്രമിക്കവെയാണ് അപകടം നടന്നതെന്നാണ് ദൃക്സാക്ഷികൾ പറയുന്നത്. ബസിന്റെ മുൻഭാഗം പൂർണമായും തകർന്നിട്ടുണ്ട്. ബസിലെ ഡീസൽ റോഡിലേക്കൊഴികിയിട്ടുണ്ട്. അപകടം നടന്ന ഉടൻതന്നെ പോലീസും അഗ്നി രക്ഷാസേനയും സ്ഥലത്തെത്തി.അപകടം നടന്ന സ്ഥലത്ത് നിന്ന് ബസ് മാറ്റാനുള്ള ശ്രമം തുടങ്ങിയിട്ടുണ്ട്.
Most Read| ഇന്ത്യക്കാരെയും നാടുകടത്തി ട്രംപ്; ടെക്സസിൽ നിന്ന് ആദ്യവിമാനം പുറപ്പെട്ടു
