പയ്യന്നൂർ: കണ്ടങ്കാളി സ്കൂളിലെ 105 എ ബൂത്തിൽ പ്രിസൈഡിങ് ഓഫീസർക്ക് മർദ്ദനമേറ്റതായി പരാതി. പാനൂർ സ്വദേശി മുഹമ്മദ് അഷ്റഫ് കളത്തിലിനാണ് മർദ്ദനമേറ്റത്. തലശ്ശേരി പാറാൽ ഡിഐഎ കോളേജ് പ്രൊഫസറാണ് മുഹമ്മദ് അഷ്റഫ്.
റേഷൻ കാർഡുമായി വോട്ട് ചെയ്യാൻ എത്തിയ വോട്ടറെ വോട്ട് ചെയ്യാൻ പ്രിസൈഡിങ് ഓഫീസർ അനുവദിച്ചില്ല. ഇതിനെ തുടർന്ന് വാക്കേറ്റമുണ്ടാകുകയും ഓഫീസർക്ക് മർദ്ദനം ഏൽക്കുകയും ആയിരുന്നു. അതേസമയം, തിരഞ്ഞെടുപ്പ് കമ്മീഷൻ അനുവദിച്ച തിരിച്ചറിയൽ രേഖകളിൽ റേഷൻ കാർഡ് ഇല്ലാത്തതിനാലാണ് വോട്ട് ചെയ്യാൻ അനുവദിക്കാത്തതെന്ന് പ്രിസൈഡിങ് ഓഫീസർ പറഞ്ഞു.
സംഭവത്തെ തുടർന്ന് അരമണിക്കൂറോളം പോളിംഗ് നിർത്തിവെച്ചു. മർദ്ദനമേറ്റ പ്രിസൈഡിങ് ഓഫീസർ പയ്യന്നൂർ താലൂക്ക് ആശുപത്രിയിൽ ചികിൽസ തേടി. പകരം മറ്റൊരാളെ ഏർപ്പെടുത്തിയ ശേഷമാണ് ഇവിടെ പോളിംഗ് പുനരാരംഭിച്ചത്.
Read also: യന്ത്രത്തകരാർ; കൊടുവള്ളിയിൽ നാലിടത്ത് വോട്ടിംഗ് വൈകി