മുംബൈ: റിലയൻസ് ഗ്രൂപ്പ് ചെയർമാൻ മുകേഷ് അംബാനിയെ പിന്തള്ളി, അദാനി ഗ്രൂപ്പ് ചെയർമാൻ ഗൗതം അദാനി ഏഷ്യയിലെ ഏറ്റവും വലിയ ധനികനായി. ഈയിടെ അദാനി ഗ്രൂപ്പ് കമ്പനികളുടെ ഓഹരിമൂല്യം കുതിക്കുകയും റിലയൻസിന്റേത് താഴുകയും ചെയ്തത് അവരുടെ ആസ്തി മൂല്യത്തിലുണ്ടാക്കിയ മാറ്റമാണിതിന് കാരണം.
9100 കോടി ഡോളറാണ് അംബാനിക്ക് കഴിഞ്ഞ വർഷം ബ്ളൂംബെർഗ് കണക്കാക്കിയിരുന്ന ആസ്തിമൂല്യം. അദാനിയുടേതാകട്ടെ 8880 കോടി ഡോളറും. ഇക്കൊല്ലം അദാനിയുടെ ആസ്തിയിൽ 5500 കോടി ഡോളർ വർധന ഉണ്ടായപ്പോൾ അംബാനിക്ക് ഉണ്ടായത് 1430 കോടി ഡോളർ മാത്രമാണ്.
അദാനി എന്റർപ്രൈസസ്, അദാനി പോർട്സ് , അദാനി ട്രാൻസ്മിഷൻ, അദാനി പവർ തുടങ്ങിയ കമ്പനികളുടെ ഓഹരി മൂല്യം കഴിഞ്ഞ ദിവസങ്ങളിൽ ഉയരുകയായിരുന്നു. എന്നാൽ, സൗദി അരാംകോയുമായുള്ള ഇടപാടിൽ നിന്ന് റിലയൻസ് പിൻമാറിയതോടെ റിലയൻസ് ഓഹരികളുടെ വില ഇടിയുകയും ചെയ്തു. ഇതാണ് അദാനിക്ക് നേട്ടമായത്.
Read Also: ഐഎസ്എല്ലിൽ ജയം തേടി ബ്ളാസ്റ്റേഴ്സ്; വെല്ലുവിളിയുമായി നോർത്ത് ഈസ്റ്റ്