കണ്ണൂർ: ജില്ലയിൽ ഇന്നലെ 25,000 ഡോസ് കോവിഷീൽഡ്‌ വാക്‌സിൻ കൂടി ലഭ്യമായ സാഹചര്യത്തിൽ നാളെ 110 കേന്ദ്രങ്ങളിൽ വാക്‌സിനേഷൻ നടക്കുമെന്ന് ജില്ലാ ആരോഗ്യവിഭാഗം അധികൃതർ അറിയിച്ചു. സ്‌പോട് രജിസ്ട്രേഷൻ വഴിയാണ് വാക്‌സിൻ നൽകുക. ഇതിൽ 40 ശതമാനം വാക്‌സിൻ ആദ്യ ഡോസ് മുൻഗണനാ വിഭാഗത്തിൽപെട്ടവർക്കും രണ്ടാം ഡോസ് ലഭിക്കേണ്ട 18 വയസിന് മുകളിലുള്ളവർക്കുമാണ് വിതരണം ചെയ്യുക.
വാക്‌സിനിലെ പത്ത് ശതമാനം വീതം ഓൺലൈനായി ബുക്ക് ചെയ്‌ത്‌ അപ്പോയ്‌മെന്റ് ലഭിച്ചവർക്കും, ഹെൽത്ത് പോർട്ടൽ വഴി അപ്പോയ്‌മെന്റ് ലഭിച്ച ജോലി/ പഠന ആവശ്യങ്ങൾക്കായി വിദേശത്ത് പോകുന്നവർക്കും നൽകും. സ്‌പോട് വാക്‌സിനേഷന് പോകുന്നവർ അതാതു വാർഡുകളിലെ ആരോഗ്യ പ്രവർത്തകർ, ആശാവർക്കർമാർ, വാർഡ് മെമ്പർമാർ എന്നിവർ മുഖേന മുൻകൂട്ടി അപ്പോയ്‌മെന്റ് എടുത്ത് വാക്‌സിൻ ലഭ്യത ഉറപ്പു വരുത്തണമെന്ന് അധികൃതർ അറിയിച്ചു.
നിലവിൽ ജില്ലയിൽ 3,000 ഡോസ് കോവാക്‌സിനും സ്‌റ്റോക്ക് ഉണ്ടെന്ന് അധികൃതർ പറഞ്ഞു. ഇത് അടുത്ത ദിവസങ്ങളിൽ പ്രത്യേക ക്യാമ്പ് സംഘടിപ്പിച്ചു ഒന്നാം ഡോസ് ലഭിക്കാത്ത 1,500 പേർക്ക് നൽകും. ഇവർക്ക് രണ്ടാം ഡോസ് നൽകുന്നതിനായി ബാക്കിയുള്ള 1,500 ഡോസ് മാറ്റിവെക്കുകയും ചെയ്യും. ജില്ലയിൽ ഇന്ന് വാക്‌സിനേഷൻ ഉണ്ടായിരിക്കില്ലെന്ന് ജില്ലാ മെഡിക്കൽ ഓഫിസർ അറിയിച്ചു.
Read Also: ലക്ഷദ്വീപിൽ തിങ്കളാഴ്‌ച സ്‌കൂളുകൾ തുറക്കും; രക്ഷിതാക്കളുടെ അനുമതി പത്രം നിർബന്ധം
