ന്യൂയോര്‍ക്ക്: യു എസ് ഓപ്പണ്‍ ടെന്നീസ് പുരുഷ സിംഗിള്‍സില്‍ തകര്‍പ്പന്‍ പ്രകടനം കാഴ്ച വെച്ച് ബ്രിട്ടീഷ് താരം ആന്‍ഡി മറെ. ജാപ്പനീസ് താരം യോഷിഹിറ്റോ നിഷിയോകയുമായുള്ള മത്സരം 5 മണിക്കൂര്‍ നീണ്ടുനിന്നു. യു എസ് ഓപ്പണ്‍ 2020 യുടെ ആദ്യ റൗണ്ടില്‍ മറെ നിഷിയോകക്കെതിരെ ആവേശകരമായ അഞ്ച് മത്സരങ്ങളാണ് കളിച്ചത്. മറെയുടെ കരിയറിലെ ഏറ്റവും മികച്ച തിരിച്ചുവരവായിരുന്നു ഇത്.
ഒന്നാം റൗണ്ടില്‍ രണ്ട് സെറ്റിന് മറെ പിന്നിലായിരുന്നു. ആദ്യ രണ്ട് സെറ്റ് 6-4, 6-4 ന് നിഷിയോക സ്വന്തമാക്കിയെങ്കിലും മൂന്നാം സെറ്റില്‍ ടൈബ്രേക്കറിലൂടെ മറെ കനത്ത തിരിച്ചടി നല്‍കി. നാലാം സെറ്റിലും ഒരു മാച്ച് പോയിന്റ് സംരക്ഷിക്കാന്‍ താരത്തിന് കഴിഞ്ഞു. ശേഷം 6-4 ന് അഞ്ചാം സെറ്റ് സ്വന്തമാക്കി മറെ രണ്ടാം റൗണ്ടിലേക്ക് കുതിച്ചു.
കാലിനുണ്ടായ പരിക്ക് മൂലം ശസ്ത്രക്രിയക്ക് വിധേയനാവേണ്ടി വന്ന മറെ രണ്ട് വര്‍ഷത്തിന് ശേഷം കളിക്കുന്ന ആദ്യത്തെ ഗ്രാന്‍ഡ്സ്ലാം സിംഗിള്‍സ് മത്സരമായിരുന്നു യു എസ് ഓപ്പണ്‍.
