ശ്രീനഗർ: ജമ്മു കശ്‌മീരിൽ വെടിനിർത്തൽ കരാർ പാകിസ്‌ഥാൻ വീണ്ടും ലംഘിച്ചു. പാക് വെടിവെപ്പിൽ ഒരു സൈനികൻ വീരമൃത്യു വരിച്ചു. ജമ്മു കശ്‌മീരിലെ രജൗരി ജില്ലയിൽ നൗഷേര സെക്‌ടറിലാണ് സംഭവം നടന്നത്. ഹവൽദാർ പാട്ടീൽ സൻഗ്രാം ശിവാജി എന്ന സൈനികനാണ് വെടിവെപ്പിൽ കൊല്ലപ്പെട്ടത്.
കശ്‌മീരിലെ നഗ്രോട്ട ദേശീയപാതയിൽ ജെയ്‌ഷെ മുഹമ്മദ് തീവ്രവാദികളും സുരക്ഷാ സേനയും തമ്മിൽ രണ്ടു ദിവസം മുൻപ് നടന്ന ഏറ്റുമുട്ടലിന് പിന്നാലെയാണ് പാക് പ്രകോപനം. ഏറ്റുമുട്ടലിൽ 4 ഭീകരരെ സേന വധിച്ചിരുന്നു.
അതേസമയം പാകിസ്‌ഥാന്റെ ഡെൽഹിയിലുള്ള ഹൈകമ്മീഷനെ ഇന്ത്യ വിളിച്ചുവരുത്തി. നഗ്രോട്ടയിൽ നടന്ന ഏറ്റുമുട്ടലിൽ പ്രതിഷേധം അറിയിക്കാനാണ് ഹൈകമ്മീഷനെ വിളിച്ചുവരുത്തിയത്. കഴിഞ്ഞ ദിവസങ്ങളിൽ പലതവണ പാകിസ്‌ഥാൻ വെടിനിർത്തൽ കരാർ ലംഘിച്ചിരുന്നു. ബുധനാഴ്‌ച രണ്ടുതവണ ഇന്ത്യൻ പോസ്‌റ്റിലേക്ക് പാകിസ്‌ഥാൻ വെടിയുതിർത്തിരുന്നു.
Read also: രാജീവ് ഗാന്ധി വധക്കേസ്; പേരറിവാളനെ വെറുതെ വിടണമെന്ന് ആവശ്യപ്പെട്ട് വിജയ് സേതുപതി
