അബുദാബി : യുഎഇയില്‍ കഴിഞ്ഞ 24 മണിക്കൂറിലും കോവിഡ് രോഗികളുടെ എണ്ണത്തില്‍ വര്‍ധന ഉണ്ടായതായി റിപ്പോര്‍ട്ടുകള്‍. രാജ്യത്ത് 2,950 പേര്‍ക്കാണ് കഴിഞ്ഞ ദിവസം മാത്രം രോഗം സ്‌ഥിരീകരിച്ചത്. ഇതോടെ രാജ്യത്തെ ആകെ കോവിഡ് ബാധിതരുടെ എണ്ണം 2,24,704 ആയി ഉയര്‍ന്നു. കൂടാതെ കോവിഡ് ബാധിച്ചു ചികില്‍സയില്‍ കഴിഞ്ഞിരുന്ന 3 പേര്‍ കൂടി രാജ്യത്ത് കഴിഞ്ഞ ദിവസം മരിച്ചു. രാജ്യത്തിതുവരെ 697 മരണങ്ങളാണ് ഇതുവരെ റിപ്പോര്‍ട് ചെയ്‌തിട്ടുള്ളത്.
അതേസമയം തന്നെ കഴിഞ്ഞ 24 മണിക്കൂറില്‍ രാജ്യത്ത് കോവിഡ് മുക്‌തരായ ആളുകളുടെ എണ്ണവും 2000ന് മുകളിലാണ്. 2,218 ആളുകള്‍ കഴിഞ്ഞ ദിവസം രാജ്യത്ത് കോവിഡ് മുക്‌തരായി. നിലവില്‍ രാജ്യത്ത് റിപ്പോര്‍ട് ചെയ്‌ത ആകെ കോവിഡ് കേസുകളില്‍ 2,01,396 പേരും ഇതുവരെ കോവിഡ് മുക്‌തരായിട്ടുണ്ട്. ഇതോടെ രാജ്യത്തിന്റെ വിവിധ ഭാഗങ്ങളില്‍ ഇപ്പോള്‍ ചികില്‍സയില്‍ കഴിയുന്ന ആളുകളുടെ എണ്ണം 22,611 ആയി കുറഞ്ഞു. രാജ്യത്തിതുവരെ ഏകദേശം 2.2 കോടിയിലധികം കോവിഡ് പരിശോധനകള്‍ നടത്തിയതായി ആരോഗ്യമന്ത്രാലയം വ്യക്‌തമാക്കി. ഒപ്പം തന്നെ 8,87,696 ആളുകള്‍ യുഎഇയില്‍ ഇതുവരെ കോവിഡ് വാക്‌സിന്‍ സ്വീകരിച്ചതായും ആരോഗ്യമന്ത്രാലയം അറിയിച്ചു.
Read also : യുകെ മലയാളികളുടെ ശ്രമങ്ങൾ വിജയം കണ്ടു; ലണ്ടൻ-കൊച്ചി വിമാന സർവീസ് വീണ്ടും ആരംഭിക്കും
