തൃശൂര്‍ : ജില്ലയില്‍ ഇന്നലെ കോവിഡ് മുക്തരായ ആളുകളുടെ എണ്ണം പോസിറ്റീവ് കേസുകളുടെ ഇരട്ടിയില്‍ അധികം. കഴിഞ്ഞ ദിവസങ്ങളില്‍ കോവിഡ് കേസുകളുടെ എണ്ണത്തില്‍ ഉയര്‍ന്നു നിന്ന തൃശൂരിന് ഇത് ആശ്വാസം പകരുന്ന കാര്യമാണ്. സംസ്‌ഥാനത്ത് ഇന്നലെ കോവിഡ് മുക്തരായ ആളുകളുടെ എണ്ണത്തില്‍ തൃശൂര്‍ രണ്ടാം സ്‌ഥാനത്ത് ആയിരുന്നു. ഒപ്പം തന്നെ കോവിഡ് പോസിറ്റീവ് കേസുകളുടെ എണ്ണത്തില്‍ ജില്ല ഇന്നലെ അഞ്ചാം സ്‌ഥാനത്തും ആയിരുന്നു.
ജില്ലയില്‍ ഇന്നലെ കോവിഡ് മുക്തരായ ആളുകളുടെ എണ്ണം 967 ആണ്. അതേസമയം രോഗബാധിതരായ ആളുകളുടെ എണ്ണം 433 ആയി കുറഞ്ഞിട്ടുണ്ട്. ഇതോടെ ജില്ലയിലെ ആകെ രോഗബാധിതരുടെ എണ്ണം 41,147 ആയി. ഇവരില്‍ 31,022 ആളുകളും ഇതുവരെ രോഗമുക്‌തരായിട്ടുണ്ട്. നിലവില്‍ ജില്ലയുടെ വിവിധ ഭാഗങ്ങളില്‍ ചികിൽസയില്‍ കഴിയുന്ന ആളുകളുടെ എണ്ണം 9797 ആയി കുറഞ്ഞിട്ടുണ്ട്.
ഇന്നലെ രോഗം സ്‌ഥിരീകരിച്ച 433 കേസുകളില്‍ 420 പേര്‍ക്കും സമ്പര്‍ക്കത്തിലൂടെയാണ് രോഗബാധ ഉണ്ടായത്. കൂടാതെ 5 ആരോഗ്യ പ്രവര്‍ത്തകര്‍ക്കും, അന്യ സംസ്‌ഥാനത്ത് നിന്ന് വന്ന ഒരാള്‍ക്കും രോഗം സ്‌ഥിരീകരിച്ചിട്ടുണ്ട്. ഉറവിടം അറിയാത്ത 7 കേസുകളാണ് ഇന്നലെ ജില്ലയില്‍ റിപ്പോര്‍ട്ട് ചെയ്‌തത്. ജില്ലയില്‍ ഇതുവരെ 3,07,093 സാംപിളുകള്‍ പരിശോധിച്ചതായാണ് റിപ്പോര്‍ട്ടുകള്‍ വ്യക്‌തമാക്കുന്നത്.
Read also : ചോദ്യങ്ങളിൽ നിന്ന് ഒഴിഞ്ഞ് മാറി ബിനീഷ്; കൂടുതൽ തെളിവുകൾ തേടി ഇഡി
