തിരുവനന്തപുരം: എകെജി സെന്ററില്‍ സിപിഐഎം ദേശീയ പതാക ഉയര്‍ത്തിയത്, ദേശീയ പതാക സംബന്ധിച്ച ഫ്‌ളാഗ് കോഡിന്റെ ലംഘനമാണെന്ന ആരോപണവുമായി യൂത്ത് കോണ്‍ഗ്രസ് സംസ്‌ഥാന വൈസ് പ്രസിഡണ്ട് കെഎസ് ശബരീനാഥന്‍.
ദേശീയ പതാകയോടൊപ്പം അതേ ഉയരത്തിൽ തൊട്ടടുത്ത് മറ്റൊരു പതാകയും സ്‌ഥാപിക്കരുത് എന്ന നിയമത്തിന്റെ നഗ്‌നമായ ലംഘനമാണ് എകെജി സെന്ററിൽ നടന്നതെന്ന് ശബരീനാഥന്‍ ആരോപിക്കുന്നു. ദേശീയ പതാകയോടൊപ്പം പാർട്ടി കൊടിയും ഉണ്ടായിരുന്നു. പാർട്ടി കൊടിക്ക് പ്രാമുഖ്യവും ദേശീയ പതാകയ്‌ക്ക്‌ രണ്ടാം സ്‌ഥാനവുമാണ് നൽകിയത്. ഇത് ദേശീയപതാകയെ അപമാനിക്കുന്ന രീതിയാണ്.
നാഷണല്‍ ഫ്‌ളാഗ് കോഡ് 2.2 (viii) ഇവിടെ ലംഘിച്ചിട്ടുണ്ടെന്ന് ഫേസ്ബുക്ക് പോസ്‌റ്റിലൂടെ കെഎസ് ശബരീനാഥന്‍ ആരോപിക്കുന്നു. സിപിഎമ്മിനെതിരെ ഇന്ത്യൻ ഫ്‌ളാഗ് കോഡ് ലംഘനത്തിനുള്ള കേസെടുക്കണമെന്നും ശബരീനാഥന്‍ ആവശ്യപ്പെട്ടു. 75ആം സ്വാതന്ത്ര്യദിന ആഘോഷത്തിന്റെ ഭാഗമായി തിരുവനന്തപുരത്ത എകെജി സെന്ററിൽ പാർട്ടി സെക്രട്ടറി എ വിജയരാഘവനാണ് പതാക ഉയ‍ർത്തിയത്.
Also Read: വണ്ടാനം മെഡിക്കല്‍ കോളേജിനെതിരായ ആരോപണം; അന്വേഷണത്തിന് ഉത്തരവിട്ട് ആരോഗ്യമന്ത്രി
