ലണ്ടൻ: ഗെയിം ഓഫ് ത്രോൺസ്, ദി അവഞ്ചേഴ്സ് എന്നീ ടിവി പരമ്പരകളിലൂടെ ആരാധകരുടെ മനസ് കീഴടക്കിയ ഹോളിവുഡ് താരം ഡയാന റിഗ് (82) അന്തരിച്ചു. കാൻസർ ബാധിതയായിരുന്ന ഡയാന രോഗം മൂർച്ഛിച്ചതിനെ തുടർന്നാണ് മരിച്ചത്. സ്വവസതിയിലായിരുന്നു അന്ത്യം.
1938 ൽ ഇംഗ്ലണ്ടിലെ ഡോൺകാസ്റ്ററിൽ ആണ് ഡയാന ജനിച്ചത്. 1959ൽ റോയൽ ഷേക്സ്പിയർ കമ്പനിയിലൂടെ അരങ്ങിലെത്തി. 1960 കളിൽ ‘ദി അവഞ്ചേഴ്സ്’ പരമ്പരയിലെ രഹസ്യ ഏജന്റായ എമ്മ പീൽ എന്ന കഥാപാത്രത്തിലൂടെയാണ് ഡയാന പ്രശസ്തയാവുന്നത്. തുടർന്ന് നിരവധി സിനിമകളിൽ വേഷമിട്ടു. 1969 ൽ പുറത്തിറങ്ങിയ ‘ഓൺ ഹെർ മജസ്റ്റീഡ് സീക്രഡ് സർവീസ്’ എന്ന സിനിമയിൽ ജെയിംസ് ബോണ്ടിന്റെ ഭാര്യ ട്രേസിയുടെ വേഷമിട്ടു. ഗെയിം ഓഫ് ത്രോൺസിൽ ഒലേന ടൈറൽ എന്ന കഥാപാത്രത്തെയാണ് അവതരിപ്പിച്ചത്. ബാഫ്ത, എമ്മി പുരസ്കാരങ്ങൾ നേടിയിട്ടുണ്ട്. ആരാധകരും ഹോളിവുഡിലെ പ്രമുഖരും സമൂഹ മാദ്ധ്യമങ്ങളിലൂടെ താരത്തിന് ആദരാഞ്ജലി അർപ്പിച്ചു.