പാറ്റ്ന: ബീഹാര്‍ മുഖ്യമന്ത്രി സ്‌ഥാനത്തേക്ക് താന്‍ അവകാശവാദം ഉന്നയിച്ചിട്ടില്ലെന്നും മുഖ്യമന്ത്രി സ്‌ഥാനത്ത് ആര് വേണമെന്ന് എന്‍ഡിഎ തീരുമാനിക്കുമെന്നും ജെഡിയു നേതാവ് നിതീഷ് കുമാര്‍. ‘എന്‍ഡിഎ മുന്നണിയെയാണ് ബീഹാര്‍ ജനത തിരഞ്ഞെടുത്തത്. ആ മുന്നണി തന്നെ സര്‍ക്കാര്‍ രൂപീകരിക്കും’, നിതീഷ് പറഞ്ഞു.
ദീപാവലിക്ക് മുന്‍പോ ശേഷമോ ആയിരിക്കും സര്‍ക്കാര്‍ രൂപീകരണം. അക്കാര്യത്തില്‍ നിലവില്‍ തീരുമാനം വന്നിട്ടില്ലെന്നും നിതീഷ് പറഞ്ഞു. തെരഞ്ഞെടുപ്പ് ഫലത്തെക്കുറിച്ച് വിശകലനം നടത്തുകയാണെന്നും നിതീഷ് കൂട്ടിച്ചേര്‍ത്തു. വെള്ളിയാഴ്‌ച മുന്നണിയിലെ പാര്‍ട്ടികളുമായി കൂടിക്കാഴ്‌ച നടത്തുമെന്നും നിതീഷ് പറഞ്ഞു.
സര്‍ക്കാര്‍ രൂപീകരണത്തില്‍ സുപ്രധാന വകുപ്പുകള്‍ സംബന്ധിച്ച് സഖ്യകക്ഷികള്‍ തമ്മില്‍ തീരുമാനമായിട്ടില്ല എന്നാണ് റിപ്പോര്‍ട്ട്. ആഭ്യന്തരവും വിദ്യാഭ്യാസവും അടക്കം പ്രധാന വകുപ്പുകള്‍ ബിജെപി ഏറ്റെടുത്തേക്കും. നിതീഷ് കുമാര്‍ വീണ്ടും അധികാരത്തിലേക്ക് എത്തുകയാണെങ്കില്‍ സംസ്‌ഥാനത്ത് ഏറ്റവും കൂടുതല്‍ തവണ മുഖ്യമന്ത്രിയാകുന്ന വ്യക്‌തിയാകും.
Read also: നിതീഷിനെ വീണ്ടും മുഖ്യമന്ത്രിയാക്കുന്നത് വോട്ടര്‍മാരെ അധിക്ഷേപിക്കുന്ന നടപടി; ശിവസേന
