തിരുവനന്തപുരം: വോട്ടര്‍ പട്ടികയിലെ ഇരട്ടവോട്ടുകള്‍ സംബന്ധിച്ച് ജില്ലാ കളക്‌ടര്‍മാര്‍ നടത്തുന്ന പരിശോധനകള്‍ക്ക് ശേഷം തുടര്‍ നടപടിയുണ്ടാകുമെന്ന് വ്യക്‌തമാക്കി മുഖ്യതിരഞ്ഞെടുപ്പ് ഓഫീസര്‍ ടിക്കാറാം മീണ. വോട്ട് ഇരട്ടിപ്പ് വന്നതിന്റെ കാരണം ഉള്‍പ്പടെയുള്ള വിവരങ്ങള്‍ കളക്‌ടര്‍മാര്‍ ശേഖരിക്കുന്നുണ്ടെന്ന് കമ്മീഷന്‍ അറിയിച്ചു. മാര്‍ച്ച് 30നാണ് പരിശോധന അവസാനിക്കുക.
വിഷയത്തില്‍ വിശദമായ സത്യവാങ്മൂലം ഹൈക്കോടതിയില്‍ സമര്‍പ്പിക്കുമെന്ന് കമ്മീഷന്‍ വ്യക്‌തമാക്കി. നിലവിലെ പരിശോധനകളുടെ വിവരങ്ങളും ഇറോനെറ്റ് സോഫ്റ്റ്‌വെയറിന്റെ ഉപയോഗവും വിഷയത്തില്‍ സ്വീകരിക്കുന്ന തുടര്‍ നടപടികള്‍ എന്നിവയെല്ലാം കോടതിയെ ബോധിപ്പിക്കുമെന്നും ടിക്കാറാം മീണ അറിയിച്ചു.
പ്രതിപക്ഷ നേതാവ് രമേശ് ചെന്നിത്തല ഇരട്ടവോട്ടില്‍ നടപടി ആവശ്യപ്പെട്ട് കോടതിയില്‍ ഹരജി സമര്‍പ്പിച്ചിരുന്നു. തുടര്‍ന്ന് ഹൈക്കോടതി തിരഞ്ഞെടുപ്പ് കമ്മീഷനോട് വിശദീകരണം തേടുകയും ചെയ്‌തിരുന്നു. ഹരജി വീണ്ടും തിങ്കളാഴ്‌ച പരിഗണനക്ക് എടുക്കുന്നുണ്ട്. ഇതിന് മുന്‍പ് തന്നെ വിശദമായ സത്യവാങ്മൂലം നല്‍കാനുള്ള നീക്കത്തിലാണ് കമ്മീഷന്‍.
Read Also: രാജ്യസഭ തിരഞ്ഞെടുപ്പ് വിജ്‌ഞാപനം ഉടൻ പുറപ്പെടുവിക്കണം; എളമരം കരീം
