ആരാധകര്‍ ഏറെ ഉറ്റുനോക്കുന്ന പോരാട്ടത്തിനാണ് ഇംഗ്‌ളീഷ് പ്രീമിയര്‍ ലീഗ് ഇന്ന് സാക്ഷ്യം വഹിക്കുക. ഒലെ ഗണ്ണാര്‍ സോള്‍ഷ്യാറിന്റെ മാഞ്ചസ്‌റ്റര്‍ യുണൈറ്റഡും പെപ് ഗ്വാര്‍ഡിയോളയുടെ മാഞ്ചസ്‌റ്റര്‍ സിറ്റിയുമാണ് ഓള്‍ഡ് ട്രാഫോര്‍ഡില്‍ നടക്കുന്ന മല്‍സരത്തില്‍ പരസ്‌പരം മാറ്റുരക്കുക. ഇന്ന് രാത്രി 11 മണിക്കാണ് മല്‍സരം.
ലീഗില്‍ യഥാക്രമം ഏഴും എട്ടും സ്‌ഥാനത്താണ് മാഞ്ചസ്‌റ്റര്‍ യുണൈറ്റഡും മാഞ്ചസ്‌റ്റര്‍ സിറ്റിയും ഉള്ളത്. ഒരു പോയിന്റിന്റെ ലീഡ് വ്യത്യാസം മാത്രമുള്ള ഇരു ക്‌ളബ്ബുകളും ഇന്ന് ജയം നേടി ആദ്യ നാലിലേക്ക് മുന്നേറാനാണ് ലക്ഷ്യമിടുന്നത്
അവസാന മല്‍സരത്തില്‍ ലൈപ്‌സിഗില്‍ നിന്നുമേറ്റ പരാജയത്തില്‍ നിന്നും കരകയറാന്‍ ഇന്ന് മാഞ്ചസ്‌റ്റര്‍ യുണൈറ്റഡിന് വിജയം കൂടിയേ തീരു. സ്വന്തം നാട്ടിലെ എതിരാളികളെ തോല്‍പ്പിച്ച് കൊണ്ട് വിജയവഴിയിലേക്ക് വരാമെന്ന പ്രതീക്ഷയിലാണ് യുണൈറ്റഡ് താരങ്ങള്‍ ഇന്ന് കളത്തിലിറങ്ങുക.
അതേസമയം ഇന്നത്തെ മല്‍സരത്തില്‍ കവാനി മാഞ്ചസ്‌റ്റര്‍ യുണൈറ്റഡ് നിരയില്‍ ഇന്ന് ഉണ്ടാകാന്‍ സാധ്യതയില്ലെന്നാണ് വാര്‍ത്തകള്‍. എന്നാല്‍ ടീമിലേക്ക് മാര്‍ഷ്യല്‍ തിരികെയെത്തുമെന്നും റിപ്പോര്‍ട്ടുകള്‍ പറയുന്നു. മാത്രവുമല്ല പെപ് ഗ്വാര്‍ഡിയോളക്ക് എതിരെ സോള്‍ഷ്യാറിനുള്ള മികച്ച റെക്കോര്‍ഡ് യുണൈറ്റഡിന് കൂടുതല്‍ പ്രതീക്ഷ നല്‍കുന്നുണ്ട്. കഴിഞ്ഞ സീസണില്‍ രണ്ട് തവണ ലീഗില്‍ ഏറ്റുമുട്ടിയപ്പോഴും മാഞ്ചസ്‌റ്റര്‍ യുണൈറ്റഡിനൊപ്പം ആയിരുന്നു വിജയം. കൂടാതെ കെവിന്‍ ഡി ബ്രുയിനും ബ്രൂണൊ ഫെര്‍ണാണ്ടസും ഉള്ളതിനാല്‍ തന്നെ ഇരുഭാഗത്തും ഗോള്‍വല കുലുങ്ങുമെന്നതില്‍ ആരാധകര്‍ക്ക് സംശയമുണ്ടാകാന്‍ ഇടയില്ല.
Read Also: സ്‌റ്റൈല്‍മന്നന് പിറന്നാള്‍ ആശംസകള്‍ നേര്‍ന്ന് പ്രധാനമന്ത്രി
