സാന്റിയാഗോ: ലോകത്തെമ്പാടും ആശങ്ക വിതക്കുന്ന കൊറോണ വൈറസ് ഇപ്പോൾ മൃഗങ്ങളിലേക്കും പടരുന്നതായി പഠനങ്ങൾ. സാന്റിയാഗോ മൃഗശാലയിലെ സഫാരി പാർക്കിലുള്ള 8 ഗൊറില്ലകൾക്ക് ജനുവരി ആദ്യവാരം കൊറോണ വൈറസ് സ്‌ഥിരീകരിച്ചതായി മൃഗശാല അധികൃതർ വെളിപ്പെടുത്തി. മൃഗശാലയിലെ രണ്ടു ഗൊറില്ലകൾക്ക് ചുമയും പണിയും കണ്ടെത്തിയതിനെ തുടർന്ന് നടത്തിയ പരിശോധനയിലാണ് കോവിഡ് 19 രോഗം സ്‌ഥിരീകരിച്ചത്‌. ഇതിനെ തുടർന്ന് മൃഗശാലയിലെ മറ്റു മൃഗങ്ങൾക്കും ഇത് ബാധിച്ചിരിക്കാമെന്ന നിഗമനത്തിലാണ് അധികൃതർ.
ചെറിയ രീതിയിൽ ചുമയും ശ്വാസതടസവും ഉള്ള ഗൊറില്ലകളുടെ ഗൊറില്ലകളുടെ ആരോഗ്യസ്‌ഥിതി ഗുരുതരമല്ലെന്നും അധികൃതർ അറിയിച്ചു. കോവിഡ് സ്‌ഥിരീകരിച്ച ഗൊറില്ലകളെ ക്വാറന്റയിൻ ചെയ്‌തെന്ന് മൃഗശാല എക്‌സിക്യൂട്ടീവ് ഡയറക്‌ടർ ലിസ പേഴ്‌സൺ അറിയിച്ചു. മൃഗശാലയിലെ കോവിഡ് പോസിറ്റീവായ ജീവനക്കാരിൽ നിന്നായിരിക്കും ഗൊറില്ലകൾക്ക് വൈറസ് ബാധിച്ചതെന്ന് കരുതുന്നു.
അമേരിക്കയിൽ ഇതാദ്യമായാണ് ഗൊറില്ലകളിൽ കോവിഡ് 19 സ്‌ഥിരീകരിക്കുന്നത്. പൂച്ച, പട്ടി എന്നിവക്ക് കോവിഡ് സ്‌ഥിരീകരിച്ചതായി നേരത്തെ റിപ്പോർട്ടുകൾ ഉണ്ടായിരുന്നു. ന്യൂയോർക്ക് ബ്രോൺസ് മൃഗശാലയിലെ കടുവക്കും കോവിഡ് 19 സ്‌ഥിരീകരിച്ചിരുന്നു.
Read also:കോവിഡ് വാക്‌സിനെതിരെ വ്യാജപ്രചാരണം; മുന്നറിയിപ്പുമായി യുഎഇ
