പാലക്കാട് : ജില്ലയിൽ ചിറ്റൂർ തത്തമംഗലത്ത് കോവിഡ് നിയന്ത്രണങ്ങൾ ലംഘിച്ച് കുതിരയോട്ട മൽസരം നടത്തി. 45 കുതിരകളെ പങ്കെടുപ്പിച്ചുകൊണ്ടാണ് മൽസരം നടത്തിയത്. തുടർന്ന് ആള്‍ക്കൂട്ടം ഉണ്ടാകും വിധം ചടങ്ങ് സംഘടിപ്പിച്ചതിന് കണ്ടാലറിയാവുന്ന അഞ്ഞൂറിലധികം പേര്‍ക്കെതിരെ പോലീസ് കേസെടുത്തു.
സംസ്‌ഥാനത്ത് കോവിഡ് വ്യാപനം രൂക്ഷമായി തുടരുമ്പോൾ കടുത്ത നിയന്ത്രണങ്ങൾ ഏർപ്പെടുത്തിയ സാഹചര്യത്തിലാണ് ആൾക്കൂട്ടം ഉണ്ടാക്കികൊണ്ട് കുതിരയോട്ട മൽസരം സംഘടിപ്പിച്ചിരിക്കുന്നത്. രണ്ടു കൊല്ലത്തിലൊരിക്കല്‍ നടത്തുന്ന അങ്ങാടിവേലയുടെ ഭാഗമായി രാവിലെ ഏഴരമുതല്‍ എട്ടരവരെയായിരുന്നു കുതിരയോട്ടം. കോവിഡ് നിയന്ത്രണങ്ങൾ ലംഘിച്ചത് ശ്രദ്ധയിൽപെട്ടതോടെ കൂടുതൽ പോലീസ് സംഘമെത്തി മൽസരം നിർത്തിച്ചു.
നിലവിൽ പകർച്ചവ്യാധി നിയന്ത്രണ നിയമ ലംഘനത്തിനാണ് സംഘാടകർ ഉൾപ്പടെ ഉള്ളവർക്കെതിരെ കേസ് രജിസ്‌റ്റർ ചെയ്‌തത്‌. വേലയുടെ ഒരുക്കങ്ങൾ തുടങ്ങിയപ്പോൾ തന്നെ ജില്ലാ ഭരണകൂടത്തെ വിവരം അറിയിച്ചുവെന്നും, എന്നാൽ ചടങ്ങ് നിർത്തിവെക്കാൻ വേണ്ട നടപടികൾ ജില്ലാ ഭരണകൂടത്തിന്റെ ഭാഗത്ത് നിന്നും ഉണ്ടായിട്ടില്ലെന്നുമാണ് പോലീസ് ആരോപിക്കുന്നത്. കൂടാതെ ചടങ്ങിന് വേണ്ടി ഒരു കുതിരയെ പങ്കെടുപ്പിക്കാൻ പോലീസ് നിർദേശം നൽകിയിരുന്നെങ്കിലും, സംഘാടകർ 45 കുതിരകളെ പങ്കെടുപ്പിക്കുകയായിരുന്നു.
Read also : വീണ്ടും ദുരിതം; ഡെൽഹിയിൽ ഓക്‌സിജൻ കിട്ടാതെ 20 മരണം കൂടി, 210 പേരുടെ നില ഗുരുതരം
