തരംഗമായി മാറിയ സോഷ്യല്‍ മീഡിയാ ആപ്പായ ക്ളബ്ഹൗസില്‍ തന്റെ പേരില്‍ വ്യാജ അക്കൗണ്ട് തുടങ്ങിയയാളെ തുറന്നുകാട്ടി നടന്‍ പൃഥ്വിരാജ്. ‘സൂരജ് നായര്‍’ എന്ന സോഷ്യല്‍ മീഡിയാ പ്രൊഫൈലിന്റെ ഉടമയാണ് തന്റെ പേരില്‍ വ്യാജ അക്കൗണ്ട് തുടങ്ങിയതെന്ന് നടന്‍ തുറന്നുകാട്ടി. ഇയാളുടെ സോഷ്യല്‍ മീഡിയാ അക്കൗണ്ടിന്റെ സ്‍ക്രീന്‍ഷോട്ട് ഉള്‍പ്പടെ പങ്കുവച്ചുകൊണ്ടാണ് തന്റെ പേരിലുള്ള വ്യാജ അക്കൗണ്ടിനെതിരെ താരം പ്രതികരിച്ചത്.
ദയവുചെയ്‌ത്‌ ഇത്തരം പ്രവര്‍ത്തനങ്ങള്‍ അവസാനിപ്പിക്കണം എന്നും പൃഥ്വിരാജ് തന്റെ ഇന്‍സ്‌റ്റഗ്രാം ഹാന്‍ഡിലിൽ പങ്കുവെച്ച പോസ്‌റ്റിലൂടെ ആവശ്യപ്പെട്ടു. തന്റെ ഇന്‍സ്‌റ്റഗ്രാം ഐഡിയോട് ഏറെ സാമ്യം തോന്നുന്ന തരത്തില്‍ വ്യാജ അക്കൗണ്ട് ആരംഭിച്ചതുള്‍പ്പടെ ഉള്ള കാര്യങ്ങള്‍ കുറ്റകൃത്യത്തിന്റെ പരിധിയില്‍ വരുന്നതാണെന്നും പൃഥ്വിരാജ് ചൂണ്ടിക്കാട്ടി.
View this post on Instagram
‘എന്റെ പേര് പറഞ്ഞുകൊണ്ട് സോഷ്യല്‍ മീഡിയയില്‍ ഇടപെടല്‍ നടത്തുന്നത് അവിടെ നില്‍ക്കട്ടെ. എന്നാല്‍ ഞാനെന്ന് ഭാവിക്കുകയും, എന്റെ ശബ്‌ദം അനുകരിക്കുകയും എന്റെ ഇന്‍സ്‌റ്റഗ്രാം അക്കൗണ്ടിനോട് അടുത്ത സാമ്യം തോന്നുന്ന ഐഡി ഉപയോഗിക്കുകയും ചെയ്യുന്നത് എല്ലാത്തരത്തിലും കുറ്റകൃത്യമാണ്. ദയവുചെയ്‌ത്‌ ഇത് അവസാനിപ്പിക്കണം. ഞാന്‍ ക്ളബ്ഹൗസില്‍ ഇല്ല,’ താരം വ്യക്‌തമാക്കി.
നേരത്തെ ദുൽഖർ സൽമാൻ ഉൾപ്പടെയുള്ള താരങ്ങളും ഇത്തരത്തിലുള്ള വ്യാജ അക്കൗണ്ടുകൾക്കെതിരെ രംഗത്തെത്തിയിരുന്നു.
Read Also: ഐപിഎല്‍ 2021: രണ്ടാംഘട്ടം സെപ്റ്റംബര്‍ 19 മുതല്‍; ഒക്‌ടോബര്‍ 15ന് ഫൈനല്‍
