ന്യൂഡെല്‍ഹി: രാജ്യത്ത് അതിര്‍ത്തി ലംഘിച്ച് എത്തിയതിന് പിടികൂടിയ ചൈനീസ് സൈനികനെ ഇന്ത്യ ചൈനക്ക് കൈമാറി. രാജ്യാന്തര നിയമങ്ങള്‍ പാലിച്ച് അതിര്‍ത്തി താവളമായ ചുഷൂല്‍-മോള്‍ഡോ മേഖലയില്‍ വെച്ചു തിങ്കളാഴ്‌ച രാവിലെ പത്തിനാണ് ഇയാളെ കൈമാറിയത്.
ശനിയാഴ്‌ചയാണ് കിഴക്കന്‍ ലഡാക്കില്‍ അതിര്‍ത്തി ലംഘിച്ച് ചൈനീസ് സൈനികന്‍ ഇന്ത്യന്‍ മേഖലയിലേക്ക് കടന്നത്. മാസങ്ങള്‍ക്കു മുന്‍പ് പാംഗോങ്ങില്‍ ചൈന കടന്നുകയറാന്‍ ശ്രമിച്ച മേഖലയിലായിരുന്നു ഇയാള്‍ കടന്നുകയറാന്‍ ശ്രമിച്ചത്.
ഇരുരാജ്യങ്ങള്‍ക്കും ശക്‌തമായ സൈനിക സാന്നിധ്യമുള്ള മേഖലയാണിത്. കഴിഞ്ഞ 3 മാസത്തിനിടെ ഇത് രണ്ടാം തവണയാണ് ചൈന ചൈന നിയന്ത്രണരേഖ ലംഘിക്കുന്നത്. അതേസമയം കസ്‌റ്റഡിയിലെടുത്ത ചൈനീസ് സൈനികനെ വിശദമായി ചോദ്യം ചെയ്‌ത ശേഷമാണ് വിട്ടയച്ചതെന്ന് കരസേന അറിയിച്ചു.
Read Also: മലയാള സിനിമക്ക് ഊർജം പകരുന്ന മുഖ്യമന്ത്രിക്ക് സ്‌നേഹാദരങ്ങൾ; മോഹൻലാൽ
