കൊച്ചി: കൊടകര കള്ളപ്പണ കവർച്ചാ കേസിൽ എൻഫോഴ്‌സ്‌മെന്റ് ഡയറക്‌ടറേറ്റ് (ഇഡി) അന്വേഷണം ആവശ്യപ്പെട്ടുള്ള ഹരജി ഹൈക്കോടതി ഇന്ന് വീണ്ടും പരിഗണിക്കും. ഇഡി അന്വേഷണം ആവശ്യപ്പെട്ട് ലോക് താന്ത്രിക് യുവജനതാദള്‍ ദേശീയ പ്രസിഡണ്ട് സലീം മടവൂര്‍ സമര്‍പ്പിച്ച ഹരജിയാണ് ഹൈക്കോടതി ഇന്ന് വീണ്ടും പരിഗണിക്കുന്നത്. കേസിൽ ഇഡി ഹൈക്കോടതിയിൽ നിലപാടറിയിച്ചേക്കും. നിലപാടറിയിക്കാൻ കോടതി നേരത്തെ 10 ദിവസത്തെ സാവകാശം ഇഡിക്ക് നൽകിയിരുന്നു.
കള്ളണം വെളുപ്പിക്കല്‍ നിയമം ബാധകമായ കുറ്റകൃത്യമായിട്ടും പരാതിയില്‍ ഇഡി നടപടിയെടുക്കുന്നില്ലെന്ന് ആയിരുന്നു ഹരജിയിലെ ആരോപണം. നിയമസഭാ തിരഞ്ഞെടുപ്പിലെ പ്രചാരണ ആവശ്യത്തിനായി കൊണ്ടുവന്ന പണമാണിതെന്ന് ആരോപണമുണ്ടെന്നും ഹരജിയില്‍ ചൂണ്ടിക്കാട്ടിയിട്ടുണ്ട്. തൃശൂർ കൊടകരയിൽ വെച്ച് കാറപകടം സൃഷ്‌ടിച്ച് പണം തട്ടിയെന്നാണ് കേസ്.
ഹരജിയിൽ ഹൈക്കോടതി നിലപാട് തേടിയതിന് പിന്നാലെ കേസിൽ ഇഡി പ്രാഥമിക അന്വേഷണം തുടങ്ങിയിരുന്നു. പോലീസില്‍ നിന്ന് എഫ്ഐആര്‍ വിവരങ്ങള്‍ ശേഖരിച്ച ഇഡി കേസിന്റെ അന്വേഷണ വിവരങ്ങളും പരിശോധിച്ചിരുന്നു. കേസ് തങ്ങളുടെ പരിധിയില്‍ വരുമോയെന്നാണ് പ്രധാനമായും ഇഡി പരിശോധിച്ചത്. ഇന്ന് ഹരജി വീണ്ടും പരിഗണിക്കുമ്പോൾ ഇഡി ഇക്കാര്യങ്ങളിൽ വിശദമായ മറുപടി നൽകിയേക്കും.
Most Read: കോട്ടൂരില്‍ കൂടുതല്‍ ആനകള്‍ക്ക് ഹെർപിസ് ബാധ; കേന്ദ്രസഹായം തേടാൻ സർക്കാർ
