കൊച്ചി: സ്‌ത്രീധനത്തിനെതിരെ നിലപാടെടുത്ത കുഫോസ് (കേരള യൂണിവേഴ്‌സിറ്റി ഓഫ് ഫിഷറീസ് ആൻഡ് ഓഷ്യൻ സ്‌റ്റഡീസ്‌) വിദ്യാർഥികളെ അഭിനന്ദിച്ച് ഗവർണർ ആരിഫ് മുഹമ്മദ് ഖാൻ. കേരള ഫിഷറീസ് യൂണിവേഴ്‌സിറ്റിയിലെ വിവിധ കോഴ്‌സുകളുടെ ബിരുദദാന ചടങ്ങിൽ സംസാരിക്കുകയായിരുന്നു അദ്ദേഹം.
വിവാഹം കഴിക്കുമ്പോൾ സ്‌ത്രീധനം വാങ്ങുകയോ കൊടുക്കുകയോ ചെയ്യില്ലെന്ന സത്യവാങ് മൂലം വിദ്യാർഥികളിൽ നിന്ന് എഴുതി വാങ്ങിയ ശേഷമാണ് ബിരുദദാന ചടങ്ങ് സംഘടിപ്പിച്ചത്. വിദ്യാർഥികളുടെ നിലപാട് സമൂഹത്തിന് മുഴുവൻ മാതൃകയാണെന്ന് ഗവർണർ പറഞ്ഞു. സത്യവാങ്‌മൂലം സർവകലാശാല വൈസ് ചാൻസലറാണ് ചടങ്ങിൽ വെച്ച് ഔദ്യോഗികമായി ഗവർണർക്ക് കൈമാറിയത്.
കൊല്ലം ജില്ലയിലെ വിസ്‌മയ കേസിന്റെ പശ്‌ചാത്തലത്തിൽ ഇത്തരമൊരു സത്യവാങ്‌മൂലം നൽകുന്നവർക്കേ സർവകലാശാല ബിരുദം സമ്മാനിക്കൂ എന്ന് ചാൻസലർ കൂടിയായ ഗവർണർ പ്രഖ്യാപിച്ചിരുന്നു. സമൂഹത്തിന് വലിയൊരു സന്ദേശം കൂടി നൽകാനാണ് ഇതിലൂടെ ഉദ്ദേശിക്കുന്നതെന്നും മറ്റ് കാമ്പസുകളും ഇത് മാതൃകയാക്കണമെന്നും വിദ്യാർഥികൾ പറയുന്നു.
Also Read: സംസ്‌ഥാനത്ത് ഡോക്‌ടർമാർക്ക് എതിരെയുള്ള അതിക്രമങ്ങൾ ശ്രദ്ധയിൽ പെട്ടിട്ടില്ല; ആരോഗ്യമന്ത്രി
