ദോഹ: കോവിഡ് കേസുകൾ വർധിച്ചു വരുന്ന സാഹചര്യത്തിൽ ഖത്തറിൽ ഇന്ന് മുതൽ വീണ്ടും മാസ്ക് നിർബന്ധമാക്കി. ആരോഗ്യ കേന്ദ്രങ്ങള്‍, ജോലിസ്‌ഥലങ്ങള്‍, പൊതുഗതാഗത സംവിധാനങ്ങള്‍, പള്ളികള്‍, ജിംനേഷ്യങ്ങള്‍, മാളുകള്‍, കടകള്‍, തിയേറ്ററുകൾ എന്നിങ്ങനെയുള്ള അടച്ചിട്ട സ്‌ഥലങ്ങളിലെല്ലാം മാസ്ക് നിര്‍ബന്ധമാണ്.
6 വയസിന് മുകളിൽ പ്രായമുള്ള എല്ലാവരും അടച്ചിട്ട പൊതുസ്‌ഥലങ്ങളിൽ മാസ്ക് നിർബന്ധമായും ധരിക്കണമെന്നാണ് ക്യാബിനറ്റ് തീരുമാനപ്രകാരമുള്ള അറിയിപ്പ്. കൂടാതെ രാജ്യത്ത് കോവിഡ് കേസുകൾ വർധിക്കുന്നതിനാൽ എല്ലാവരും നിയന്ത്രണങ്ങൾ കൃത്യമായി പാലിക്കണമെന്നും അധികൃതർ കർശന നിർദ്ദേശം നൽകിയിട്ടുണ്ട്.
കോവിഡ് വാക്‌സിന്‍ ഡോസുകളും ബൂസ്‌റ്റര്‍ ഡോസുകളും സ്വീകരിക്കണം. സോപ്പും വെള്ളവും ഉപയോഗിച്ച് ഇടയ്‌ക്കിടയ്‌ക്ക്‌ കൈകള്‍ കഴുകുകയോ അല്ലെങ്കില്‍ സാനിറ്റൈസര്‍ ഉപയോഗിക്കുകയോ വേണം. മറ്റുള്ളവരെ അഭിവാദ്യം ചെയ്യുമ്പോള്‍ ശാരീരിക സ്‍പര്‍ശനം ഒഴിവാക്കണം. കൈകൊടുക്കുകയോ ചുംബിക്കുകയോ ചെയ്യരുത്. ചുമയ്‌ക്കുമ്പോഴും തുമ്മുമ്പോഴും വായും മൂക്കും ശരിയായ വിധിത്തില്‍ ടിഷ്യൂ പേപ്പറുകള്‍ കൊണ്ടോ മറ്റോ മൂടുകയും അതിന് ശേഷം ഇവ സുരക്ഷിതമായ സ്‌ഥലത്ത് ഉപേക്ഷിക്കുകയും വേണം. അധികം വായുസഞ്ചാരമില്ലാത്ത സ്‌ഥലങ്ങളില്‍ കൂട്ടംകൂടുന്നത് കഴിവതും ഒഴിവാക്കണം എന്നിങ്ങനെയാണ് അധികൃതർ നൽകിയിരിക്കുന്ന നിർദ്ദേശങ്ങൾ.
Read also: തീർഥാടന യാത്രാ പാക്കേജുമായി കണ്ണൂർ കെഎസ്ആർടിസി
