തിരുവനന്തപുരം : പാലാരിവട്ടം പാലം അഴിമതിക്കേസില്‍ അറസ്‌റ്റിലായ മുന്‍മന്ത്രി വികെ ഇബ്രാഹിം കുഞ്ഞിന്റെ ആരോഗ്യ പരിശോധന റിപ്പോര്‍ട്ട് വിദഗ്ധ സംഘം ഇന്ന് തയ്യാറാക്കും. വിദഗ്ധ പരിശോധനക്കായി രൂപീകരിച്ച സംഘം ഇന്നലെ കൊച്ചിയിലെ ലേക് ഷോര്‍ ആശുപത്രിയില്‍ എത്തി അദ്ദേഹത്തിന്റെ ആരോഗ്യനില പരിശോധിച്ചിരുന്നു. അതിന്റെ അടിസ്‌ഥാനത്തിലാണ് ഇന്ന് റിപ്പോര്‍ട്ട് തയ്യാറാക്കുക.
വിദഗ്ധ സംഘം തയ്യാറാക്കുന്ന റിപ്പോര്‍ട്ട് നാളെ ഡിഎംഒക്ക് കൈമാറുമെന്നാണ് ലഭിക്കുന്ന വിവരം. തുടര്‍ന്ന് ചൊവ്വാഴ്‌ച റിപ്പോര്‍ട്ട് മുവാറ്റുപുഴ വിജിലന്‍സ് കോടതി പരിഗണിക്കും. കോടതിയുടെ നിര്‍ദേശപ്രകാരം രൂപീകരിച്ച വിദഗ്ധ സംഘമാണ് ഇബ്രാഹിം കുഞ്ഞിനെ ആശുപത്രിയില്‍ എത്തി പരിശോധിച്ചത്.
ചൊവ്വാഴ്‌ചയോടെ ആരോഗ്യ പരിശോധന റിപ്പോര്‍ട്ട് കോടതിക്ക് ലഭിച്ച ശേഷം, അതിന്റെ അടിസ്‌ഥാനത്തില്‍ ആയിരിക്കും തുടര്‍ നടപടികള്‍ സ്വീകരിക്കുക. ഇബ്രാഹിം കുഞ്ഞ് സമര്‍പ്പിച്ച ജാമ്യാപേക്ഷയും, ഇബ്രാഹിം കുഞ്ഞിന്റെ കസ്‌റ്റഡി ആവശ്യപ്പെട്ട് വിജിലന്‍സ് സമര്‍പ്പിച്ച അപേക്ഷയും വിദഗ്ധ സംഘം സമര്‍പ്പിക്കുന്ന റിപ്പോര്‍ട്ടിന്റെ അടിസ്‌ഥാനത്തിലായിരിക്കും കോടതി പരിഗണിക്കുക.
Read also : 2021 തിരഞ്ഞെടുപ്പിലും ബിജെപിയുമായുള്ള സഖ്യം തുടരും; തമിഴ്നാട് ഉപമുഖ്യമന്ത്രി
