കൊച്ചി: പാലാരിവട്ടം അഴിമതിക്കേസില്‍ വിജിലന്‍സ് അറസ്‌റ്റ് ചെയ്‌ത മുന്‍ മന്ത്രി വികെ ഇബ്രാഹിം കുഞ്ഞിനെ പ്രത്യേക മെഡിക്കല്‍ സംഘം ഇന്ന് പരിശോധിക്കും. എറണാകുളം ജനറല്‍ ആശുപത്രി സൂപ്രണ്ട് അനിതയുടെ നേതൃത്വത്തിലുള്ള ആറംഗ സംഘമാണ് ഇബ്രാഹിം കുഞ്ഞിന്റെ ശാരീക-മാനസിക-ആരോഗ്യ നില പരിശോധിക്കുക.
ഇബ്രാഹിം കുഞ്ഞിന് ഗുരുതര ആരോഗ്യ പ്രശ്‌നങ്ങള്‍ ഉണ്ടെന്നും ആശുപത്രിയില്‍ നിന്ന് മാറ്റാന്‍ കഴിയില്ലെന്നും ആശുപത്രി അധികൃതരുടെ റിപ്പോര്‍ട്ടിനെ തുടര്‍ന്ന് വിജിലന്‍സ് സംഘം ഇബ്രാഹിം കുഞ്ഞിനെ ജില്ലാ ആശുപത്രിയിലേക്ക് മാറ്റണമെന്നാവശ്യപ്പെട്ട് കോടതിയെ സമീപിച്ചു. ഇത് പരിഗണിച്ച മൂവാറ്റുപുഴ വിജിലന്‍സ് കോടതി വൈദ്യ പരിശോധന നടത്താന്‍ ഉത്തരവിടുകയായിരുന്നു.
Also Read: ശബ്‌ദം തന്റേതെന്ന് ഉറപ്പില്ലെന്ന് സ്വപ്‌ന; വിശദീകരണം ഡിഐജിക്ക് നല്‍കിയ മൊഴിയില്‍
മെഡിക്കല്‍ സംഘം നല്‍കുന്ന റിപ്പോര്‍ട്ടിന്റെ അടിസ്‌ഥാനത്തില്‍ ആയിരിക്കും വിജിലന്‍സ് സംഘത്തിന്റെ കസ്‌റ്റഡി അപേക്ഷ കോടതി ചൊവാഴ്‌ച പരിഗണിക്കുക. അന്നേ ദിവസം ഇബ്രാഹിം കുഞ്ഞിന്റെ ജാമ്യാപേക്ഷയും കോടതി പരിഗണിക്കും.
