തിരുവനന്തപുരം: സംസ്ഥാന വനിതാ കമ്മീഷൻ അധ്യക്ഷയായി പി സതീദേവിയെ തിരഞ്ഞെടുക്കാൻ ധാരണ. ഇന്ന് ചേർന്ന സംസ്ഥാന സെക്രട്ടേറിയറ്റ് യോഗത്തിലാണ് ഇക്കാര്യത്തിൽ തീരുമാനമായത്. നിലവിൽ ജനാധിപത്യ മഹിളാ അസോസിയേഷൻ സംസ്ഥാന സെക്രട്ടറിയായ പി സതീദേവി മുൻ എംപിയും സിപിഐഎം സംസ്ഥാന സമിതി അംഗവുമാണ്.
2004ലെ തിരഞ്ഞെടുപ്പിലാണ് വടകര ലോക്സഭാ മണ്ഡലത്തിൽ നിന്നും എൽഡിഎഫ് സ്ഥാനാർഥിയായി മൽസരിച്ച പി സതീദേവി എംപിയായി തിരഞ്ഞെടുക്കപ്പെട്ടത്. അന്ന് ഒരു ലക്ഷത്തിലേറെ വോട്ടുകൾക്കാണ് സതീദേവി വിജയിച്ചത്. എന്നാൽ 2009ലെ തിരഞ്ഞെടുപ്പിൽ മുല്ലപ്പള്ളി രാമചന്ദ്രനോട് മൽസരിച്ച ഇവർ പരാജയപ്പെടുകയായിരുന്നു.
വനിതാ കമ്മീഷൻ അധ്യക്ഷ സ്ഥാനത്ത് നിന്നും എംസി ജോസഫൈൻ രാജി വച്ചതിനെ തുടർന്നാണ് ഇപ്പോൾ പുതിയ അധ്യക്ഷയെ തിരഞ്ഞെടുത്തത്. വിവാദങ്ങളെ തുടർന്ന് സ്ഥാനമൊഴിയാൻ 8 മാസം ബാക്കി നിൽക്കെയാണ് എംസി ജോസഫൈൻ രാജി വച്ചത്.
Read also: വിമാനത്താവളത്തിന്റെ മതിൽ ചാടി രക്ഷപെടാൻ ശ്രമം; വെടിയുതിർത്ത് താലിബാൻ ഭീകരർ, വീഡിയോ