ന്യൂഡെൽഹി: പ്രധാനമന്ത്രി നരേന്ദ്രമോദി ഇന്ന് യുഎഇ സന്ദർശിക്കും. ഇന്ത്യ-യുഎഇ സമഗ്ര സാമ്പത്തിക പങ്കാളിത്ത കരാര് യാഥാര്ഥ്യമായതിന് ശേഷമുള്ള പ്രധാനമന്ത്രിയുടെ ആദ്യ യുഎഇ സന്ദര്ശനമാണിത്. ജര്മനിയില് നടക്കുന്ന ജി7 ഉച്ചകോടിയില് പങ്കെടുത്ത ശേഷമായിരിക്കും അദ്ദേഹം യുഎഇ സന്ദർശനത്തിനായി അബുദാബിയില് എത്തുക.
യുഎഇ സന്ദർശനത്തിന് ശേഷം ഇന്ന് രാത്രി തന്നെ അദ്ദേഹം ഇന്ത്യയിലേക്ക് മടങ്ങും. കഴിഞ്ഞ ജനുവരിയിൽ ദുബായ് എക്സ്പോ സന്ദര്ശിക്കാന് പ്രധാനമന്ത്രി നരേന്ദ്രമോദി യുഎഇയിൽ എത്തുമെന്ന് പ്രതീക്ഷിച്ചിരുന്നുവെങ്കിലും കോവിഡ് വ്യാപനത്തെ തുടർന്ന് യാത്ര മാറ്റിവെക്കുകയായിരുന്നു.
യുഎഇയിൽ എത്തുന്ന പ്രധാനമന്ത്രി മുൻ പ്രസിഡണ്ട് ഷെയ്ഖ് ഖലീഫ ബിന് സായിദ് അല് നഹ്യാന്റെ വിയോഗത്തില് നേരിട്ട് അനുശോചനം അറിയിക്കും. കൂടാതെ പുതിയ പ്രസിഡണ്ടായി തിരഞ്ഞെടുക്കപ്പെട്ട ഷെയ്ഖ് മുഹമ്മദ് ബിന് സായിദ് അല് നഹ്യാനെ അഭിനന്ദനമറിയിക്കുകയും ചെയ്യും. നിലവിൽ നാലാം തവണയാണ് അദ്ദേഹം യുഎഇ സന്ദര്ശിക്കുന്നത്. 2015, 2018, 2019 എന്നീ വര്ഷങ്ങളിലാണ് ഇതിനു മുന്പ് പ്രധാനമന്ത്രി നരേന്ദ്രമോദി യുഎഇ സന്ദർശിച്ചിട്ടുള്ളത്.
Read also: ആൾട്ട് ന്യൂസ് സ്ഥാപകൻ മുഹമ്മദ് സുബൈർ റിമാൻഡിൽ; അറസ്റ്റിനെതിരെ പ്രതിഷേധം